Shillong Iaiong 13: U National President ka NPP u Conrad K Sangma uba long ruh u Myntri Rangbah ka Jylla hynne ka sngi Saitjaiñ, ula hiar sha ka shnong Killing kaba hap ha Jirang Constituency, Ri Bhoi District ban pan ia ka jingkyrshan na ki paidbah ba kin pynjop ia ka kyrtong jongka NPP ka Kong Ampareen Lyngdoh kaba iakhun ia ka elekshon MP Lok Sabha na Shillong Parliamentary Constituency.
U Conrad ula kren shaphang ki seng saiñ pyrthei kiba pyniapait iapra ia ka imlang sahlang da ka jingsngewpher jaidbynriew bad ula ong ba kane ka elekshon ka long kaba kongsan bha ban iada ia ka jingsynshar paidbah bad ban iakhun pyrshah ia ki bor kiba wanrah ia ka jingiapait iapra.
Ula kyntu ia ki paidbah ban vote ia ka Kong Ampareen Lyngdoh, namar ka long kaba kongsan ban jied ia ka MP kaba don ha ka liang synshar kaban donbynta ha Delhi ban wanrah ia ki kam pynroi sha ka jylla Meghalaya.
Ha katei ka jingialang, u Conrad Sangma ula pdiang sngewbha ruh ia u Sunmoon Marak bad ki nongkyrshan ki jongu kiba la wan pyniasoh sha ka seng NPP.
U Sunmoon ula iakhun ia ka elekshon MLA kaba la dep na Jirang constituency na ka seng TMC.
