Shillong, Iaiong 12 : U State President ka National People’s Party (NPP) bad Symbud Myntri Rangbah Bah Prestone Tynsong ula kynnoh ba ka Liang Pyrshah Voice of the People Party (VPP) ka leh kum ki ‘Taliban’ ha ka jingiaid ialap elekshon.
Haba thalain ia ka VPP ba ka leh polictics isih briew, u Bah Prestone ula ong “Nga la iohi ia ki jingkren jong ki. Nyngkong, ki kren ia ka jingburom ia ki jait niam bapher bapher hynrei ha ka por iaid ialap elekshon, ki kam jong ki, nga la iohi ba ki long kum ki kynhun ba kurup ia ka Aghanistan, kaba ngi khot kum ka kynhun ‘Talaban’.”
Ka kynhun Taliban kala synshar mynta ia ka Afghanistan bad kaei kaba jia ha Afghanistan, phin iohi ia ki jingpyrrkhing ha ki lad pathai khubor, ha kaba kim shym shah ban ai khubor ia kano kano ka kam. Nalor kata, wat ki khynnah kynthei la khang ia ki ban leit sha skul palat ia ka matric”.
“Bad ka ishu kaba nga sngewkhia jur eh ka dei ka rukom pyrkhat bad ka jingmut jingpyrkhat jong ki Nongialam ka VPP namar, mano ba nud ban ong ba kiwei ki bakla bad ki dei tang ma ki, ki riewkhuid, kane hi ka dei ka paw ba don ka jingbym biang ha ki. Kumta, ki paidbah ki dei ban puson lang ia kane namar kane ka dei ka kam kaba ktah bha khamtam ka rukom iaid ialap elekshon jong ki”.
Kane ka jingkren kala mih hadien arsngi ba ka VPP kala ngat ha ka show cause notice namar ka jingpyrshang ban pynthut ia ki jingialang ialap eleshon jong ka National People’s Party (NPP).
Haba kynnoh ba ka VPP kala shu kren kop ia kiei kiei baroh, u Bah Prestone ula ong “Ki sngew ba dei tang ki Khasi lane ki paid ka bri Hynniewtrep, kiba lah ban ialam sahkhmat ia ka Jylla hynei nga sngeew ba kane kam dei ka pir ia ki ban kren namar kum ba kdew uwei u riew rangbah b aka party (VPP) ka dei ka party ba kut ha ka District bad kaba don tang ha East Khasi Hills”.
U Bah Prestone ula kob ruh ia ka VPP bad ong “Lada phi sngew ba ka party jong phi ka dei kaba khlain, balei bap him pynieng kyrtong ha Ri-lum Garo. Balei ba phim pynieng kyrtong iano iano ruh? Kane ka mut ba phi kwah ban pynleit jingmut tang ha Ri-lum Khasi bad Jaintia bad phi kren kob pat la kum ba phin synshar ia ka Jylla baroh kawei tang namar ba phi ieid ia ka Jaidbynriew”.
“Hynrei nga ong ia phi ba lada ngi halor ka jingburom ia ki jait niam, peit, ka Meghalaya kam lah ban pynmih wat tang 10 percent ka khajna bad dei namar kata ba ngi hap shaniah tylli ha ka Sorkar Pdeng. Ka biang lada kino kino ki party ki synshar ha ka Sorkar Pdeng hynrei ia ki Jylla ka thain Shatei Lam Mihngi lait noh ka Assam kaba la lah ban pynmih palat 20-25 percent ka jingpynmih pisa, kiwei ki Jylla ki hap shaniah tylli ia ka jingpynmih pisa, skhim, song pisa na ka Sorkar Pdeng. Kumta, sangeh ka kren kob, namar kam don jingmut kumba nga ong ngi la iohi bad ngi la pyrshang katba lah ban pynkhlain ia ka jingpynmih pisa hynrei kam don lynti. Lada phi kren ia ki karkhana, shano ngi don ia ki karkahan heh lait noh tang ki katto katne ki karkhana dewbilat. Kane ka dei kawei ka ishu kaba ngi iatakhuh” ula ong.
Haba kyrpad ia ki paidbah ba kin ym shah pynbiej ha kum kine ki seng sain pyrthei, une u Nongialam ka NPP ula batai lypa ruh ba ka VPP kum ka party, kan sa jah klep ha kano kano ka por ha Meghalaya.
