Tripura, Iaiong 08 : U President ka BJP Tripura Rajib Bhattacharjee ha ka sngi U Blei ula pyllait paidbah ia ki kot lyngkdop bad kynnoh b aka jingtehlok hapoh ka CPI(M) bad ka Congress hapoh ka INDIA block ka dei ka bym khuid satia.
Haba iakren bad ki nongthoh khubor, u Rajib ula ong “Ka BJP kam ngi ngeit ha ki kam umsnam. Ka nuksa kaba biang eh ka dei kaba la iohi ha ka elekshon MLA 2023 ha Tripura.
Ngim ju ngeit ha ki kam umsnam. Ka CPI(M) kala leh shibun ki kam thombor ha ka por ba ka synshar bad mynta kila kren halor ka riti synshar paidbah bad ka Riti Synshar ka Ri. Baroh artylli-ka Congress bad CPI(M) ki dei kiba kyrshan ia ki kam thombor ha ka por ba ki synshar”.
“Ngi don shibun ki sakhi ia ki kam thombor ha ka sain hima sima pyrshah ia ki Communist bad congress ha ka por ba ki synshar. Shibun ki kam bamsap bad ki jingiarap tang iala ki bahaiing bad paralok parajor kala jia ha ka por jong ki hynrei mynta kila kynnoh ia ngi” ong u Rajib.
Ula bynrap “Ki paidbah ka Tripura kim lah ban klet ia ki jingjia umsnam ha ka por elekshon. Ka Communist kala kyrshan ia ki kam umsnam bad lyngba ki kam umsnam, kila ioh bat ia ka bor la bun snem”.
