Guwahati, Iaiong 06: Ka jingthmu ban wan ialap elekshon u Myntri Kam Pohiing ka ri u Amit Shah ha Hojai, Gohpur bad Lakhimpur ha ka jylla Assam kaba dei ban long ha ka 7 bad 8 tarik u Iaiong, hynrei ki tyllong khubor kila iathuh ba la pynkynriah noh sha ka 11 tarik u Iaiong.
U Myntri Rangbah duh ka ri u Narendra Modi yn wan jurip ia ka Nalbari, Assam ha ka 17 tarik u Iaiong bad ia kane la pynbna da u Myntri Rangbah ka Assam u Himanta Biswa Sarma.
Ka BJP kala dep ban pynbna ia ka kyrteng jong ki heh ki haiñ bad ki riewpawkhmat ne ki Star Campaigner kiban ialap elekshon hapoh ka jylla Assam na ka bynta ban pan ia ka jingkyrshan na ki paidbah ba kin jied ia ki kyrtong ka BJP ha ka elekshon MP Lok Sabha.
Ki Star campaigner kiba kynthup iaka Myntri ka Sorkar Pdeng ka Smriti Irani bad u MP u Manoj Tiwari ki lah ban wan jurip ia ka Dibrugarh constituency ban ialap elekshon na ka bynta ka seng ha ka taiew ban wan.
Ka Assam kala pynkhreh na ka bynta ban pynlong ia ka elekshon MP Lok Sabha 2024 ha ki 3 tylli ki wat kata ha ka 19 tarik bad 26 tarik u Iaiong bad ha ka 7 tarik u Jymmang.
Hapoh ka ri, ki don kumba 96.8 Klur ngut ki nongthep vote ha ki 12 lak tylli ki jaka thep vote ne polling station bad ka jingsdang ka jingthep Vote kan long ha ka 19 tarik u Iaiong bad ka jingniew Vote kan long ha ka 4 tarik u Jylliew.
