Itanagar, Nailar 06: Shi bynta jong ka jingiakhih ha baroh kawei ka ri, ka Arunachal Pradesh Congress Committee (APCC) ka la pynlong da ka “Raj Bhawan Gherao” ne ka jingleit tur paidbah shapoh Raj Bhawan ban pynpaw pyrshah halor ka jingkiew dor jong ki mar ki mata bad ka jingbym ioh kam ioh jam.
Da ki spah ngut ki nongialam bad ki nongtrei ka seng Congress ka ba kynthup ia u Myntri Rangbah (CM) barim u ba dei ruh u president ka APCC u Nabam Tuki ki la iashim bynta ha kane ka jingiakhih, hynrei na ka liang ki bor pulit ki la khanglad ia ki ba kin jan shakhmat ban leit gherao ia ka Raj Bhawan.
U President ka APCC u la ong; “Ban pynpaw pyrshah halor ka jingkiew dor jong ki mar ki mata, ka jingiapher ha ka ba iadei bad ka jingpyntreikam ia ka GST na ka bynta ki mar ki mata ba kongsan bad ka jingpyntreikam ia ka Agnipath scheme, mynta ka party Congress ka la pynlong da ka jingiakhih ha baroh kawei ka ri. Ka jingkiew dor jong ki mar ki mata ba kongsan kum ka LPG, Petrol bad GST ka la ktah jur khamtam ia ki riew paidbah.” “Kham hashwa ka dor jong ka LPG ka long T.400, hynrei mynta ka la kiew shaduh ka T.1100,” ka ba la buh jingeh shibun ia ki riew paidbah.Kumta ka la dei ka por ia ki paidbah ba kin pynpaw ia ki sur ki jong ki pyrshah ia ka sorkar BJP,” ong u Tuki.
Nalor kata u la ong ruh ba ha ka kyrteng jong ki lad aijam ai jam ka BJP ka la ialehkai bad ka lawei jong ki samla.Ka tnat shipai Indian Army ka dei ka ba la ioh ia ka burom ka ba khraw tam ha ki kam aijingshakri hapoh ka ri, hynrei halor kane ka bynta ruh ki la pynhiar dor ia ka jingthmu ba kyrpang jong ka bad pynduh mynsiem ia ki shipai jong ngi da ka ba ai kam tang na ka bynta saw snem, kata ruh khlem kiwei kiwei pat ki jingsiew ka ba ki dei ban ioh.
Kham hashwa na ka liang u President ka Arunachal Pradesh Youth Congress (APYC) u Tarh Johny u la kynthoh pyrshah ia ka sorkar ba la lamkhmat da ka BJP halor ka jingpyndonkam da ki bor pahara ban pynsangeh ia ka jingiaid paidbah ba jai jai shapoh Raj Bhawan. Haba ka sorkar synshar BJP ka pynlong ia ki jingiakhih ha Raj Bhawan, ym shym la don ki kynhun ki ban khanglad ia ki, ym shym la buh jingkylli ia ki, ong shuh shuh utei u president.
Shuh shuh u la kynthoh jur ia ka sorkar BJP halor ka jingpynhiar dor ia ka lama jong ka ri ha ka kyrteng jong ka “Har Ghar Tiranga” campaign.Ka jingshna ia ki lama ki bym bha bad ka jingdie ia ka lama jong ka ri ha ka dor ka ba tang T.25 kawei ka dei ka jingleh ibein ia ka ri hi baroh kawei.
