Shillong, Iaiong 01: Ka National People’s Party (NPP) kala ther tyngeh ia ka seng Voice of the People Party (VPP) ba ‘kan tei ia ka lawei’ hynrei khlem da pyni satia pat ia ka ‘Roadmap’ ka jongka sha ki paidbah.
U Nongaiktien ka NPP u Bah HM Shangpliang haba iakren bad ki nongthoh khubor ula ong, ba ka dei ka sorkar kaba la ialam da ka NPP kaba la pyntip sha ki paidbah ka jylla ia ka ‘Roadmap’ kumno ban tei iaka lawei jong ki samla.
“Ka long kaba suk ban pynthikna ia ki paidbah da kaba shu ong ba phin tei ia ka lawei tangba phim shim la pynsngewthuh pat ha knao ka rukom phin leh ia ka” ong u Bah Shangpliang bad ka buh jingkylli ia ka rukom ialap elekshon jong ki katto katne ki seng saiñ pyrthei khamtam ka VPP.
Ula ong ba ka sorkar MDA kala wanrah ia kiba bun ki sienjam na ka bynta ban tei ia ka lawei da kaba saiñdur ia ki samla bad kyntiew ia ka jingsengkam lajong ha ka jylla.
Ula pynpaw baka PRIME kadei kawei na ki Startups kaba bha tam ha ka ri kaba la sdang da ka sorkar Meghalaya bad lyngba ka PRIME, kila don 5,500 ki nongsengkam lajong kiba la ioh ia ka jingkyrshan bad kadei ruh ka sienjam kaban iarap ha kaba iadei bad ka mat jongka jingbym iohkam iohjam.
“Ki nongsengkam ki jong ngi kimdei tang ki nongthaw kam hynrei kila kylla long ruh kum ki nongaikam ia kiwei ruh” ong u Bah Shangpliang bad ka bynrap ba kumba 210 tylli ki Startups kidei kiba la ioh jingkyrshan na kane ka sorkar MDA kaba mynta bad ka sorkar kala buh ha ka jingmut jingpyrkhat na ka bynta ki samla bad kala sdang ruh ia ka Grassroots Music Projects ban plie lad ia ki ba kin pyni ia ka sap ka phong ka jongki bad ban kamai jakpoh.
Ula pyntip ba kila don palat 3000 ngut ki kaitor kiba la ioh jingkyrshan bad man la u bnai la pynlong ia ki prokram ha ki 40 tylli ki dukan bam bad Café.
U Bah Shangpliang ula kren ruh halor ka CM ELEVATE ha kaba la ai iaka subsidy kaba naduh 35% haduh 75% ha ki 19 tylli ki scheme kum ka PRIME agri response vehicle scheme, PRIME tourism vehicle scheme, warehouse scheme, sericulture & weaving scheme, common facility centre scheme, piggery development scheme, poultry farming scheme, Goat farming scheme, dairy development scheme, sports & wellness centre scheme, cinema theatre scheme, agro tourism villa scheme bad kiwei kiwei.
U Bah Shangpliang ula pyntip ba 20,000 ngut ki nongsengkam kin ioh jingyrshan lyngba ka CM ELEVATE ha ka jingmang tyngka kaba kot T.300 Klur bad la ioh pdiang ia ka aplikeshon na palat 30,000 ngut.
Ha kaba iadei bad ka lad iohkam bad ka jingkamai jakpoh, u Bah Shangpliang ula ong, ba ka sorkar MDA kala buh jingkhein ba ha ka liang ka kam jngohkai kumba 48,500 ngut ha kine ki 4 snem ban hapoh jong u 2028 bad la dep ban bhah tyngka naka bynta ban tei 450 tylli ki Homestays.
Ula ong ba ka sorkar jylla kala dep tei ia ka Shillong Tech Park ha ka wat kaba nyngkong ha ka jinglut kaba T. 62 Klur kaba la thaw 6,000 tylli ki kam ha ka Information & Technology, katba ha ka Shillong Tech Park wat baar ka jingtei ka dang iaid shakhmat ha ka jinglut kaba T.121 Klur bad la bhah T.127 Klur ruh na ka bynta ka Tura Tech Park.
“Kitei ki sienjam kidei ki païa na ka bynta ban tei ia ka lawei kaba phyrnai bad nga kyntu ia ki samla ba kidei ban shimkabu ia kitei ki kabu kaba la ai na ka bynta ka jongki da ka sorkar jylla” ong u Nongaiktien ka NPP.
