Shillong, Iaiong 1: U National President ka NPP bad Myntri Rangbah ka Jylla Conrad K Sangma ha ka sngi Nyngkong, ula ong ba ka National People’s Party (NPP) kam pat ju iapein bad ki ishu kiba dei bad ka bha ka miat jong ka Ri.
“Ka jingiadei hapdeng ka NDA bad ka NPP ka dei kaba la neh palat shiphew snem bad ka dei kaba khlain bha. Ngi don shibun ki jingtynjuh hynrei haba iatakhuh bad ka bha ka miat jong ka Ri, kano kano ka rai ba ngi shim, ngi buh shuwa ia ki paidbah ha khmat” ong u Conrad na ka rynsan ialap elekshon ia ka kyrtong ka NPP na Shillong Parliamentary seat Kong Ampareen Lyngdoh ha Jhalupara, Shillong.
Ula ong ba ka NDA bad ki paralok kila iatreilang ha kane ka elekshon Lok Sabha naba baroh ki ngeit ba hapoh ka jingialam jong u Myntri Rangbah Duh Narendra Modi, ka India kan long ka Ri kaba heh duh ha ka ioh ka kot hapoh ka pyrthei.
“Ka India kan sa long ka Ri ba lai na kiba heh duh ka ioh ka kot hapoh u 2028 bad ka dei ka Viksit (developed) hapoh u 2028. Kane ka jingiohi jngai jong u Myntri Rangbah Duh kala pyniatylli ia ngi, bad ngi la iawanlang bad iakyrshan iwei ia iwei ha kabna kynjoh ia ka thong jong ka Viksit Bharat” ula bynrap.
Haba kren halor ka Sorkar MDA ba ialam da ka NPP ha Meghalaya, ula ong “Ha kine ki hynriew snem ka jingsynshar jong ngi ia ka Jylla, kila don shibun ki jingtynjuh hynrei ngi la jop ia ki bad ngi la buh ia ka mission ban btin lynti shakhmat ia ka Jylla. Ha u 2015, ka mang tyngka ka Jylla jong ngi ka long T.7000 klur, ha u 2018 kala kiew sha ka T.9000 klur bad mynta ka mang tyngka jong ka Jylla kala long T.27,000 klur, kaba kiew haduh saw shah”.
Haba kren halor ka jingskhem ka Sorkar ban ioh ia ka synshar khadar kaba bha, une u Khliehduh ka NPP ula ong ba ka Meghalaya kala ioh khyndiat eh ia ki Sorkar kiba skhem bad ka NPP lem bad ki paralok kila pynthikna ia ka Sorkar kaba skhem ha Jylla, kaba la pynsted wut wut ia ka roi ka par bad ka jingkiew shaphrang jong ka Jylla.
“Ki Liang pyrshah ong ngi kila ong ba ka kynhun synrop jong ngi kan neh tang 2 bnai, hadien 6 bnai, hadien shisnem hynrei ngi la lah ban pyndep ia ka samoi ba pura. Ha u 2023, ki paidbah ka Meghalaya kila ai biang ka jingshaniah ha ngi bad ngi la lah ban thaw ia ka Sorkar bad ngin sa pyndep ruh ia kane ka samoi ryngkat ka jingjop” ula ong haba bynrap “Hadien bun phew snem, kala don ka Sorkar kaba skhem hapoh ka Jylla bad ki dang don shibun ki kam kiba hap leh na ka bynta ka Jylla bad ki briew jong ngi”.
Halor ka jinglong jingman ka suk ka sain ha Jylla, ula ong “Ha kiba bun ki khep, ngi la mad ia ki jingeh na ki jingmih ki jingkulmar hynrei ngi la lah pat ban tem ia ki. Ngi don bun ki jaidbynriew hangne ha Jylla bad kam long kaba suk ban donlang baroh hynrei ngi la pynthikna ban bat ia ka bha ka miat ki briew jong ngi bad ban ai ka jingsynshar kaba biang”.
Katba ka jingkren ka dang shit bha, ki riew ngeit Muslim ki dang mane Adhan ha ka Mosque ba marjan, kaba pynlong ia u Myntri Rangbah ka Jylla ban pynsangeh ia ka jingkren haduh ban da dep ka Adhan (Azan).
Halor ka New Shillong Township, ula ong ba shuwa jong ka elekshon, ka Sorkar NPP kala pynbna ia ka song pisa ba T. 10,000 klur ban shna ia ki surok, pynbiang umbam umdih, ki Ophis treikam bad ka Knowledge city ha New Shillong Township. ‘ha kine ki saw snem ban wan, ka Shillong kan sa iohi ia ka jingkylla kaba pura” ula bynrap.
Haba kyrpad ia ki paidbah ba kin vote ia ka kyrtong ka NPP Dr M Ampareen Lyngdoh, ula ong “Ka Kong Ampareen ka dei ka kyrtong kaba biang eh ban mihkhmat ia ka Jylla ha Parliament. Kan sa kren na ka bynta ki briew jong ngi. Ka Sorkar NDA kan wan biang ha ka bor ha Delhi bad ka long kaba kongsan ba ngin don ka kyrtong NDA ban shah jied napoh ka Jylla. Ka NPP ha ka Jylla bad ka NDA ha ka Sorkar Pdeng, kan pynlah ia ki ban treikam ryngkat ryngkat bad pynthikna ia ka roi ka par jong ka Jylla”.
