Dibrugarh, Iaiong 01 : U Myntri ka Sorkar Pdeng Sarbananda Sonowal ha ka sngi Nyngkong, ula ther tyngeh ia ka Sorkar Congress namar ka jingieh bein ia ka thain Shatei Lam Mihngi ha kine ki 60 snem bala leit noh.
Haba kren ha ka rynsan ialap elekshon ha Khowang jong ka Dibrugarh Lok Sabha constituency, u Sarbananda ula ong ba ka Congress kala shu ieh ia ka NE ha kine ki 60 snem bala leit noh hynrei hadien ba ka Sorkar u Narendra Modi kala shimti ia u lakam ban synshar, shibun ki kam pynroi kila sdang ban wan hapoh ka thain.
“Mynta ka thain Shatei Lam Mihngi kala jam shakhmat ha ka roi ka par hapoh ka jingialam ka Sorkar BJP. Ka Congress ha ka jingsynshar ba 60 snem, kam shym la kheinkor ia ka roi ka par jong ka thain. Ngi la jam shakhmat sha ka ‘Viksit Bharat” ong u Sonowal.
Une u Myntri ka Sorkar Pdeng ula ong “Ka Congress kala kular ia shibun kiei kiei ha ka por ba ka synshar hynrei kam shym la lah pat ban pynurlong. Ka BJP kala pyntreikam ia bun tylli ki skhim na ka bynta ka roi ka par jong ka thain Shatei Lam Mihngi bad mynta ka thain kala nang jam shakhmat sha ka roi ka par”.
U Sonowal ula leit iashimbynta ruh ha ka jingialap elekshon ha Gajpuria Bihutuli kaba hap hapoh ka Khowang Legislative Assembly, ia kaba la pdiang sngeewbha da u paidbah.
