Shillong, Nailar 05 : Ka Ryntih ka la ioh ban pynliem da 2-0 kol ia ka Mawkhar ha ka jingiakhun kaba 31 jong Shillong Premier Leauge kaba long hynne ka sngi ha madan Polo.
Ia kitei ki kol jong ka Ryntih la ioh ban thep da u Dawanplielad Myrchiang ha ka minit kaba 29 jong ka kylla step katba iaka kol kaba ar pat la ioh ban thep da u Mebankhrawlang Wahlang ha ka minit kaba 80 jong ka kylla miet.
Lah ban kdew hangne ruh, ba ka Ryntih ka la ioh ban khur ia ka jingjop pyrshah ia ka Mawkhar wat ha ka kylla kaba nyngkong jong katei ka lympung da kaba pynliem da 3-1 kol.
Da ka jingjop ha kane ka sngi, ka Ryntih ka la ioh mynta 14 point katba ka Mawkhar pat ka dang neh da 2 point ha trai duh jong ka miej ia khein point.
Ka Ryntih mynta ka la ioh ban knieh ia ka Rangdajied United ban don ha ka kyrdan kaba lai. Watla katei ka kynhun ka don markat juh ka jingkamai point bad ka Langsning hynrei namar ka jingiapher ka jingthep kol ka la wan noh ha ka kyrdan kaba lai.
Ka jingiakhun la shai ka sngi, ka 06 tarik Nailar 2022 kan long hapdeng ka Malki kaba don mynta saw point pyrshah ia ka Langsning kaba don 14 point.
