Shillong, Lber 22 : U President ka National People’s Party (NPP) ka Meghalaya bad Symbud Myntri Rangbah Bah Prestone Tynsong, ula pynpaw iaka jingsngewskhem ba ka NPP kan khur ia ka jingjop ha ka elekshon Lok Sabha ban wan na baroh artylli ki constituency ka Jylla-ka Shillong bad Tura Parliamentary seat.
Haba iakren bad ki nongthoh khubor hynne ka sngi Thohdieng hadien ka jingsynran ia ka jinglei thep kyrteng ka kong Ampareen Lyngdoh, u Bah Prestone ula ong ba ka NPP kala nang khlain nang khlain katba dang iaid ki sngi da ka jingwan pyniasoh jong kiba bun ki Nongialam na kiwei pat ki Political party bad la khmih lynti ruh ba kin dang don bun ki ban sa wan iasoh shen.
“Ki briew kila nang wan iasoh bad ngi manla ka sngi. Kila sakhi ia shibun ki jingkylla ym tang ha ka por jong ka Sorkar MDA-I hynrei wat haka Sorkar MDA-II. Ngi la pynleit jingmut bha ha baroh ki bynta jong ka bha ka miat ka Jylla, kaba la khring ia ki nongialam na ki Party bapher bapher ba kin wan iasnohkti noh bad ngi” ong u Bah Prestone.
Haba kylli, u Bah Prestone ula ong ba ki kam pynroi kiba la shim da ka Sorkar ba ialam da ka NPP bad ka jingskhem ka jing long Nongialam hapoh ka NPP ka dei kaba khring ia kiwei pat ba kin wan iasnohkti lang noh.
“Ngim judon ka jingiapher jingmut hapdeng ki Nongialam ka party hapoh ka NPP. Ngi la iatylli mlon ha ka NPP, ngi khein ialade ym tang kum ka Political party hynrei kum ka Iing ka sem” ula bynrap.
U Bah Prestone ula ong ba ka jingkhlain jong ka NPP bad ka jingkyrmen ban jop ia ka elekshon kala paw shai na ka jingwan rung dkhot jong ki Nongialam na kiwei ki Political party hashwa ka elekshon Lok Sabha, nalor ki kam jong ka party ha ki shnong ki thaw.
“Ki nongialam jong ka party jong ngi ha ki Shnong ki Thaw kila treikam bha bad kila leit rung ha manla ki thliew iing ban batai ia ka jingkongsan ban thep vote sha ka NPP…Kumta, ngi don ka jingkyrmen ba ngin jop na baroh artylli-ka Shillong bad Tura seat” ong u Bah Prestone.
