Guwahati, Lber 22 : Ki Nongkitkam bad nongkyrshan ka Aam Aadmi Party (AAP), Assam, kila pynlong ia ka jingiakhih paidbah ha Guwahati hynne ka sngi Thohdieng, ban dawa pyllait noh ia u Myntri Rangbah ka Delhi Arvind Kejriwal uba shah kem halor ka jingkynnoh donkti ha ka jyrsieh policy khaii kyiad.
Da ki spah ngut ki nongkitkam ka AAP kila thmu ban pyniaid ia ka jingiaid paidbah na Ganeshguri sha Janata Bhavan ha Guwahati hynrei ki Pulit kila khang lynti noh ia ki.
Namar ka jingkhang lynti ki Pulit, ka jingkulmar kaba mih hapdeng ki Pulit bad kine ki nongiaid rally kiba iapyrta slogan pyrshah ia ka Sorkar BJP, ia u Myntri Rangbah Duh ka Ri Narendra Modi bad ia u Myntri Rangbah ka Assam Himanta Biswa Sarma.
Ki nongiakhih kila dawa ba dei ban pyllait noh mardor ia u Arvind Kejriwal bad kynnoh ba ka BJP bad ka Sorkar ba ialam da u Myntri Rangbah Duh Narendra Modi, kala pyrshang ban pyniap ia ka bor jong u paidbah.
Ka AAP hynnin ka sngi kala pynbna ia ka jingiakhih ha baroh kawei ka Ri India, kaba long pyrshah ia ka Bharatiya Janata Party namar ka jingshah kem u Arvind Kejriwal.
Ha Dibrugarh ruh, ka AAP kala pynlong ia ka jingiakhih bad ha kane ka jaka, ki Pulit kila rah ia u kyrtong ka Dibrugarh Manoj Dhanowar, u President ka APP Bhaben Choudhary bad katto katne ngut ki nongkyrshan namar ka jingiakhih hakhmat ka Ophis ka BJP.
Haba iakren bad ki nongthoh khubor, u Rajesh Sharma uba dei khmih ia ka AAP ha ka thain Shatei Lam Mihngi ula ong “U Arvind Kejriwal ula shah kem ha ka case thok bad ka dei tang ka buit politics. U dei ban lait noh mar mar”.
Ki Nongkyrshan ka AAP kila leit rah placard bad ki lama jong ka party ban iakhih hakhmat ka ophis ka BJP.
