Shillong Lber 21: U Nongialam ka Congress bad u MP ka Lok Sabha u Bah Vincent H Pala hynne ka sngi Palei ula ong, ba ka seng Congress kan mad ia shibun ki jingpyrkhing ban iakhun ia ka elekshon MP Lok Sabha kaba 18, namar ba ka BJP kala kurup ne ‘Freeze’ ia ki 11 tylli ki Account jong ka party, kiba kot T.215 Klur.
Haba iakren bad ki nongthoh khubor hadien ba la wai ka jingialang, u Bah Pala ula ong, “Kane ka elekshon kan ym long shuh kum kiwei pat ki elekshon namar ba ka BJP kala kurup ia ki 11 tylli ki Accounts jong ka Congress, kiba kot haduh T.215 Klur”.
“Ka BJP kala dep ban sei jubor ruh ia katei ka pisa kaba kot kumba T.115 Klur na ka Account jong ka seng Congress sha ka Income Tax Account. Kumta ngin hap ban iakhun ia ka elekshon hapdeng jong kiba bun ki jingpyrkhing ha kaba iadei bad ka jingpynlut pynsep bad ka BJP kala leh ia katei namar ka tip ba kadei tang ka seng Congress kaba lah ban iakhun pyrshah ia ka”.
“Ha kine ki 3-4 bnai, ka seng kala shu lum ia u synniang na ki paidbah, ha kaba ki riewshimet ki lah ban iarap ia ka seng. Bun na Shillong kila noh ia u synniang hynrei ka BJP kala shim da kumwei pat bad kala shim noh ia ka pisa na ngi” ula ong.
U Bah Pala ula ong, ba ka don ka jingiashrut kaba shyrkhei hapoh ka seng BJP ha kylleng ki jylla jong ka ri India bad kane kan plie lad plie lynti ia ki seng ki bym don ha ka sorkar BJP ban ioh ban thaw ia ka sorkar pdeng hadien ka elekshon.
