New Delhi, Lber 21 : Tang da ki taiew ban poi ka elekshon Lok Sabha, u Myntri Rangbah ka Delhi bad Khliehduh ka Aam Aadmi Party Arvind Kejriwal, ula shah kem ha ka Enforcement Directorate halor ka jyrsieh policy khaii kyiad.
U Kejriwal un dei u Myntri Rangbah ba nyngkong eh ha ka histori jong ka Ri India u ban shah kem katba u dang don ha ka shuki bad ka AAP kala pyntip ba u Kejriwal un dang iai bteng ban bat beit ia ka shuki.
Haba kren shabar ka Iingsah u Myntri Rangbah hynne ka sngi Palei, u Myntri ka Delhi Atishi ula ong “Ngi la ioh khubor ba ka ED kala kem ia u Kejriwal. Ka jingkem ia u ka dei ka buit sopsop jong ka BJP bad u Myntri Rangbah Duh ka Ri Narendra Modi. Naduh ka jingtohkit ia kane ka case arsnem mynshuwa, ka ED ne ka CBI kam pat ju ioh kurup wat tang shi tyngka ruh ha ka jingkhynra ba 1000 sien ia ki Nongialam ka AAP bad ki Myntri Sorkar”.
Ka kynhun jong ka ED ba don haduh 12 ngut, kala leit sha Iing u Kejriwal ban khynra ha ka janmiet sngi Palei bad kylli jingkylli ia u hashuwa ka jingkem. Kine ki briew ka ED kila kurup ia ka phone jong u lem bad jong ka kurim bad ia ki data baroh na ki artylli ki tablet bad ka laptop ha Iingsah, la shim lut da ka ED.
Katba ki briew ka ED ki dang tohkit ia u ha iingsah, ki Pulit ka Delhi bad ka Rapid Action Force lem bad ka kynhun ki CRPF kila ieng pahara habar jong ka Iingsah. La pynjari ruh ia ka kyndon 144 CrPC shabar ka Iingsah u Kejriwal lem bad ki katto katne ki nongialam bad Nongtrei ka APP.
