Pyllait paidbah ia ka video ba iakren phone u Commander ka HNLC bad u samla
Shillong, Lber 21 : Ka Tnad Meghalaya Police, kala lap ba ka seng Hynniewtrep National Liberation Council (HNLC) kala iaid pynngop/pynbiej (brain wash) ia ki samla ba lui lui hapoh Ri-lum Khasi Jaintia, ban lah pyniaid ia ka kam dawa pisa.
Ki Pulit kila pyllait paidbah ruh hynne ka sngi Palei ia ka video jong ka jingiakren phone hapdeng u Commander ka HNLC Sanbor Pala bad uwei na ki briew ba donkti hakhmat eh ha ka jingpyntbei bomb bad ioh kurup bomb IED ha Nongpoh.
Ia kane la pyntip da u Superintendent of Police ka Ri-Bhoi District Jagpal Singh Dhanoa, uba la iathuh ba ia kane ka kam jong ka HNLC la shem na ka jingtohkit ia ki briew kiba shah kem halor ka Nongpoh PS Case 25(3)24 bala pynngat hapoh ka kyndon 120B/121A pule lang bad ka kyndon 10/13/18 jong ka UA(P) Act bad kyndon 5/6 jong ka Explosive Substance Act.
Une u Heh Pulit u pyntip ba ki Pulit ka Ri-Bhoi kila kem biang sa arngut ki briew halor kane ka kajuh ka case bala register hapoh ka Nongpoh Police Station.
Kat kum ka jingong une u Heh Pulit, ki Pulit ka Ri-Bhoi kila pynlong ruh mynta ia ka jingtohkit halor ka kam synniang pisa sha ka HNLC bad ong ba lada shem ia kino kino ki briew kiba don bynta, kin ngat ha ka jingshah kylli jingkylli bad shah tian bishar kat kum ki kyndon jong ka UA(P) Act.
Nalor kane, u pyntip ba ki Pulit ka Ri-Bhoi kila register ruh sa kawei ka case ba iadei bad ka jingpynher ia ka lama jong ka HNLC ha surok National Highway, Ri-Bhoi myn ha u bnai Nailar 2023.
“Baroh ki kam bymman jong ka HNLC la tohkit mynta lyngba ki social media ba VOIP platform” ong u Dhanao haba bynrap ba baroh la bthah ba lada don ba phone na ka HNLC, ki dei ban pyntip mar mar sha ki Pulit bad khang (block) ruh ia a profile/nombor ba phone.
Kat kum ka video bala pyllait da ki Pulit, la iohsngew ia ka jingiakren hapdeng u Commander ka HNLC Sanbor Pala ula pynshlur ban leh ia ka kam (khlem da kren shai kam aiu) jong ka HNLC ia kaba une u samla ula pynpaw ba um kwah satia ban leh ia kane ka kam namar ba sheptieng ioh ngat ki para Jaidbynriew lajong.
La iohsngew ruh ba une u samla ula pynpaw ba un bret noh ia ka tiar (khlem da batai tiar aiu) namar ka jingtieng.
Ki Pulit ki suba jur ba lehse kane ka tiar ka lah ban dei u bomb IED namar na ka jingkren une u samla, ula pynpaw ba ioh ngat ki para Jaidbynriew lajong.
U Jagpal Singh Dhanoa ula pynpaw ba ki Pulit ka Ri-Bhoi kila kut jingmut kaba skhem ba kino kino kiba don bynta bad ka seng HNLC kin sa shah kem bad shah pynkit ia ka jingbahkhlieh.
