Shillong, Lber 20: Satang da ki taiew ban wan ka elekshon Lok Sabha, ka National People’s Party (NPP) kala nang suhthied shuh shuh mynta ha Ri-Bhoi District da ka jingmut wan pyniasoh sa u MLA barim ka UDP na Mawhati bad ka MDC barim ka UDP na Nongpoh, kiba dei ki shi Kni shi Pyrsa.
Kine ki shi Kni shi Pyrsa ki dei u Nongialam ba radbah ka UDP Bah Donbok Khymdeit, MLA/MDC barim ka Mawhati lem bad ka MDC barim ka UDP na Nongpoh Kong Rona Khymdeit, kaba iakhun ia ka elekshon MLA-2023 na ka Congress.
Kine ki arngut kin sa pyniasoh sha ka NPP ha ka sngi Thohdieng bad yn pdiang sngewbha ia ki sha ka sem ka NPP da u President ka NPP Meghalaya bad Symbud Myntri Rangbah ka Jylla Bah Prestone Tynsong, ha ka jingialang kaba long ha shnong Sajer, Nongpoh.
Ha kane ka jingialang la iadonlang ruh u National General Secretary Bah Sniawbhalang Dhar, ka kyrtong MP Lok Sabha na Shillong Parliamentary Constituency Kong Ampareen Lyngdoh, ki MLA, MDC ka NPP, ki nongialam ka NPP ryngkat bad ki paid nongkyrshan jong ka Kong Rona Khymdeit bad u Bah Donboklang Khymdeit.
