Shillong, Lber 19 : Ban lah pynthikna ba ka jingpynlong ia ka elekshon MP Lok Sabha ha ka jylla ka long kaba iaid beit bad kaba khuid ba suba, ka Jylla Meghalaya kala pan 18 pyrton ki bor pahara ban pyndonkam ha ka por elekshon.
U Superintendent of Police ka East Khasi Hills u Rituraj Ravi hynne ka sngi Baar, ula iathuh ba ka jylla Meghalaya kala pan 11 pyrton ki Central Reserve Police Force (CRPF) bad sa 7 pyrton ki State Armed Police Force (SAPF).
Ula ong, ba na kitei ki 18 tylli ki pyrton, ka jylla kala ioh shwa 3 pyrton bad kitei kila don hapoh ka jylla mynta.
Ar tylli ki pyrton CRPF kila don ban peit ia ka jinglong jingman bad la bynshet ha ki ia ka kam elekshon bad ia kawei ka pyrton la buh ha ka nongbah.
Nalor kane u SP ula iathuh ba ka tnad Pulit kala dep thaw ia ka Flying Squad Teams (FST) bad ia ka Static Surveillance Teams (SST) katkum ka jingbthah jong ka Election Commission of India (ECI) bad kine ki ar tylli ki kynhun kila sdang ban treikam shaid shaid.
Ula iathuh ba ki pulit kila buh ia ki jaka ban khmih bniah bad ban pynlong ia ka jingkhynra ban pynthikna ba kan don ka jingpeitngor bha ha kylleng ki nongbah jong ki District bapher bapher.
Namar ba ka jylla Meghalaya ha hap ha ka Watkaba Nyngkong ne Phase – I kaba don artylli ki Parliamentary Constituency, ka elekshon kan long ha ka 19 tarik u Iaiong.
U Superintendent of Police ka East Khasi Hills ula banjur ia ka jingdonkam ban pynneh ia ka shongsuk shongsaiñ bad ia ka elekshon kaba iaid beit bad ula kyntu ia ki paidbah ba kin mih shakhmat ban leit thep vote khlem kano kano ka jingtieng ne jingshah pynbor.
 bad sa 7 pyrton ki State Armed Police Force (SAPF).){kind=link}