Shillong, Lber 15 : U National General Secretary ka NPP bad Symbud Myntri Rangbah Bah Sniawbhalang Dhar, ula kynnoh ba ka seng Congress ka dei kaba la don ha Intensive Care Unit (ICU) bad kan long leh noh ei ban jied biang ia u kyrtong bad MP ba mynta Bah Vincent H Pala na Shillong Parliamentary Seat.
Kat kum ka jingong jong u, kan long leh nohei ruh ia ki paidbah ban ai vote ia ka Voice of the People Party (VPP) bad ka United Democratic Party (UDP) namar kine kin kut tang ha Byrnihat bad kin ym poi shano shano ruh.
Haba kren ha ka jingialang kaba long ha Byrnihat, Ri-Bhoi ha ka sngi Palei, ban pan ia ka jingkyrshan ia ka kyrtong ka NPP na Shillong bad Myntri Sorkar kong Ampareen Lyngdoh, u Bah Sniawbha ula ong ba kin don 4-5 ngut ki kyrtong, ki ban iakhun ia kaelekshon Lok Sabha na Shillong.
“Hynrei, u kyrtong ka UDP un nym poi shano shano ruh bad u kyrtong ka VPP kumba phi iatip, un kut tang ha Nongpoh (Byrnihat)” ula ong. Ula kynnoh ruh ba ki Nongthep vote, khamtam ki Garo bad ki bar jylla, kin ym jied satia ia kine ki artylli ki party.
Haba kynnoh ba ka Congress ka dei ka jhad kaba la ngam, u Bah Sniawbha ula ong “Ka Congress ka dei ka party, kaba la don mynta ha ICU bad ngam tip kaei ka ban jia ia ka. Kane ka Party bala rim duh hapoh ka Ri kala don satang 5 ngut ki MLA ha Meghalaya. Ka Party kaba ju synshar ha ka Sorkar Pdeng, kaba la ioh shisien haduh 543 ngut ki MP hynrei kala don satang 40-50 ngut bad ha kane ka elekshon ban wan, ngam tharai ba kan tam wat ia ka 40 seat. Kumta, balei ngin phah biang ia u MP ka congress. Lada ngi phah ia ka Congress, ngi la iakhun ia ka thma kaba la rem lypa”.
“Namar kata, nga kyrpad ia ki paidbah ba ka lynti ia mynta ka dei ia phi ban vote ia ka NPP kong Ampareen Lyngdoh” ula ong haba bynrap ba ki paidbah ki tip bha ban bishar ia ka jingtreikam jong u Bah Vincent Pala ha kine ki 15 snem bala leit noh.
Ha kajuh ka por, u Bah Sniawbha ula pyntip ba kum u Myntri ka Tnad Transport, ula shimkhia ban iakren bad ka Sorkar Pdeng ban mang pisa ha kaban shna ia ka surok 8 lane na Khanapara sha Byrnihat bad ka surok 4-lane na Umroi sha Ri-lum Jaintia khnang ban pynkylluid ia ka jingiaid ki kali bad lait ka dheng.
U Symbud Myntri Rangbah ula ai jingiaroh ruh ia u MLA ka Jirang Bah Sosthenes Sohtun halor ka jingtrei shitom ban wanrah ia ka roi ka par hapoh ka constituency. Ula ong ba une u MLA u ju iapyni nia wat bad u Myntri Rangbah manla ka janmiet ban ioh ia ki kam pynroi hapoh ka constituency.
Ia kane ka jingialang la pyniaid da u MLA ka Jirang bad la wan iashimbynta da ki Nongialam bad ki nongtrei jong ka party na kylleng ka them Ri-Bhoi.
 bad kan long leh noh ei ban jied biang ia u kyrtong bad MP ba mynta Bah Vincent H Pala na Shillong Parliamentary Seat.){kind=link}