Agartala, Lber 15 : Ka Democratic Youth Federation of India (DYFI) bad ka Tribal Youth Federation(TYF) kila pynlong ia ka rally kaba hehbha ha Agartala ban pynpaw ia ka jingpyrshah ia ka notification ka Sorkar Pdeng ban pyntreikam noh ia ka Citizenship (Amendment) Act (CAA).
Kine ki nongiakhih kiba rah ia ki poster bad ki banner, kila pyrta slogan pyrshah ia ka Sorkar BJP namar ka jingpyntreikam ia ka CAA.
Haba iakren bad ki nongthoh khubor, u Secretary ka DYFI ula ong “Ka CAA ka dei kaba be-riti kaba la shu pyntreikam jubor da ka Sorkar BJP. Ka dei kawei na ki ishu bah eh bha namar ka jingthmut jong ka, ka long ban phiah bad synshar. Ngi pyrshah jur ia kaneka CAA namar ka dei kaba long pyrshah ia ka Riti Synshar ka Ri”.
Une u Nongialam ula maham halor ki jingmih kiban buh jingma na ka jingpyrshang ban pyniaphiah ia ki nongshongshnong dakaba pynshong nongrim na ka niam.
U Deb ula ong ba ka porba pynmih ia ka Notification ka CAA ruh ka dei tang ka buit ban kdat sharud ia ka jingmut jing pyrkhat u paidbah na ki ishu kiba kongsan kum ka jingbym iohkam iohjam, ka jingkiewdor ki mar ki mata, ka jingnang ban ka jingduk, kaba ka Sorkar kam shym la leh eiei.
U Nongialam ka CPIM kynthup u Myntri Rangbah barim Manik Sarkar, ula iashimbynta ha kane ka rally.
