Aiti ka High Level Committee ia ka kaiphod sha ka President
Shillong Lber 15: Ka High level Committee halor ka jingpynlong lang ia ki elekshon ha kajuh ka por ba la thung hapoh ka jingialam jong u Ram Nath Kovind, President barim ka India, ka la aiti ia ka Kaiphod kaba don 18,626 sla sha ka President jong ka India, Droupadi Murmu.
Ka Kaiphod ka dei ka jingmih na ki jingiamir jingmut bad kito kiba don bynta ha kane ka kam, ki riewshemphang bad ka kam wad bniah kaba 191 sngi, naduh ba la thung ia ka ha ka 2 tarik Nailur, 2023.
Kiwei kiwei ki dkhot jong ka Committee ki kynthup ia u Myntri ka Sorkar Pdeng uba khmih ia ka Kam Pohiing u Amit Shah, u Nongialam barim ka Liang Pyrshah ha Rajya Sabha u Ghulam Nabi Azad, u N.K. Singh, Chairman barim ka 15th Finance Commission, u Dr.Subhash C. Kashyap u Secretary General barim ka Lok Sabha, u Harish Salve u Senior Advocate bad u Sanjay Kothari, Chief Vigilance Commissioner barim bad u Dr.Niten Chandra u Secretary jong ka HLC.
Ka Committee ka la pynlong ia ki jingiamir jingmut ban sngewthuh ia ki jingsngew jong kito kiba don bynta ha kane ka kam.
Kila don 47 tylli ki seng sain pyrthei kiba la aiti ia ki jingsngew bad ki jingai jingmut jong ki, na kane 32 ki kyrshan ia ka jingpynlong elekshon lang ha kajuh ka por.
Bun ki seng sain pyrthei ki la pynlong ki jingiamir jingmut bad ka HLC halor kane ka phang.
Hadien ka jingpynbna paidbah ba la pyllait ha ki kot khubor ha baroh ki jylla bad ki Union Territory, 21,558 tylli ki jubab kidei kiba la iohpdiang na ki briew jong ka ri, ha kaba 80 percent kiba jubab ki kyrshan ia ka jingpynlong elekshon ha kajuh ka por.
La khot sngewbha da ka Komiti ia ki riewshemphang ha ka ain ia ki saw ngut ki Chief Justice barim jong ka India, phra ngut ki State Election Commissioner bad Chairman, Law Commission ka India ban iakren halor kane ka kam bad la twad jingmut ruh na ka Election Commission jong ka ri India.
La khot ruh ia ki kynhun kiba trei ha ki kam khaii pateng kum ka CII, FICCI, ASSOCHAM bad ki riewshemphang ha ki kam ka ioh ka kot ba kin ai jingmut halor ka jingktah ia ka ioh ka kot lada pynlong elekshon lang ha kajuh ka por. Kila ong, ba kane ka long kaba donkam na ka bynta ka ioh ka kot namar ka jingpynlong elekshon ha ki por bapher bapher ka wanrah ia ka jingkiew dor ki mar bad ka jingsuki jong ka ioh ka kot.
Kine ki kynhun kila ong, ia ka Komiti ba ka jingpynlong elekshon na ka por sha ka por ka ktah ia ka jingkiew ka ioh ka kot, ka jingpynlut pisa na ka bynta ki paidbah, ka pule puthi bad ka ktah ruh ia ka shongsuk shongsain ha ka imlang sahlang.
Hadien ka jingpyrkhat jylliew shaphang kine ki jingai jingmut bad ki jingsngew, ka Komiti kala ai jingmut ia ka rukom treikam kaba ar bynta ban ialam sha ka jingpynlong lang ia ka elekshon ha kajuh ka por. Kum ka sienjam ba nyngkong, yn pynlong elekshon lang na ka bynta ka Iing Dorbar Thaw aiñ jong ki paidbah bad ki Iing dorbar Thaw Ain jong ki Jylla.
Ha ka sienjam kaba ar, yn pyniahap lang ia ki elekshon na ka bynta ki Municipality bad ki Panchayat ha kajuh ka por bad kine ki Iing Dorbar Thaw Ain ha ka rukom ba ki elekshon jong ki Municipality bad ki Panchayat kin long hapoh shispah sngi hadien ba la pynlong ia ki elekshon na ka bynta ka Iing Dorbar Thaw aiñ jong ki paidbah bad ki Iing dorbar Thaw Aiñ jong ki Jylla.
Ka Komiti ka la ai jingmut ruh ba ka dei ban don tang kawei ka Electoral Roll bad ki Electoral Photo Identity Card (EPIC) ban pyndonkam ha ki elekshonna ka bynta ki lai kyrdan jong ka Sorkar.
Katkum ka kam jong ka ban peit ia ki rukom pyntreikam na ka bynta ka jingpynlong lang ia ki elekshon ha kajuh ka por bad da kaba kynmaw ia ka jinglong jong ka Riti Synshar, ka Komiti ka la ai ia ki jingmut jongka ha ka rukom ba iahap bad ka jinglong jong ka Riti Synshar jong ka India bad ha ka rukom ba donkam tang katto katne ki jingpynkylla ia ka RitiSynshar.
Hadien ki jingiamir jingmut, ka Komiti ka la ong, ba baroh ki jingai jingmut jong ka kin kyntiew ia ka jingshai, ka jingai bynta lang ia baroh, ka jingshaniah bad ka jingsuk jong ki nongthep vote. Ka jingkyrshan kaba pura na ka bynta ka jingpynlong lang ia ka elekshon ha kajuh ka por kan kyntiew ia ki kam na ka bynta ka roi ka par bad ka jingiaid ryntih ka imlang sahlang, pynskhem ia ka nongrim jong ka synshar paidbah bad pynurlong ia ki jingthmu jong ka India kaba long ka Bharat.
Ia ka kaiphod ba pura lah ban ioh ha ka: onoe.gov.in/HLC-Report.
Kaiphod ha ka ktien phareng (https://onoe.gov.in/HLC-Report-en#flipbook-df_manual_book/1/), Kaiphod ha ka ktienHindi (https://onoe.gov.in/HLC-Report-hi#flipbook-df_manual_book/1/), Flyer English, Flyer Hindi, FAQs.
