Shillong, Lber 12 : Ka Sorkar Jylla ha ka sngi Ba-ar, kala ai jingmynjur ia ka jingtyrwa ban thied ia ka jaka bret niut naka bynta ka Williamnagar, East Garo Hills District.
Haba pyntip ia kane hadien ka jingialang jong ka Kynhun Myntri, u Myntri Rangbah ka Jylla Conrad K Sangma ula ong “Ngi la ai jingmynjur ruh ban thied ia ka jaka theh niut ha Rong-a-gre, East garo Hills na ka bynta ka sor Williamnagar. Kumba phi tip, kine ki jaka ba thymmai kin ym dei satia tang ki jaka theh niut hynrei kin dei ki jaka ba recycle bad pynia phiah ia ki niut”.
Ula pyntip ruh ba hynnin ka sngi, ka Sorkar kala buh ia u maw nongrim jong ka bio-mining ka Marten bad ka kam jong kane la dep ban aiti sha kawei ka agency bad la khmih lynti ba ka jingpyntrei kan sa sdang ha kane ka taiew hi bad kane ka juh ka agency kan leit trei ruh ha Tura.
Ha kajuh ka por, ka kynhun Myntri kala ai jingmynjur ban pynkylla ia ka Meghalaya Cooperative Service Rules, 2003 bad ka Meghalaya Urban Affairs Service Rules na ka bynta ban pynbeit ryntih ia ka jingtreikam jong kine ki artylli ki Tnad.
