Shillong, Lber 12 : U Myntri Rangbah ka Jylla Conrad K Sangma ha ka sngi Ba-ar, ula ong ba ka Sorkar Jylla kala jan dep artad ban ioh ia ki lad ki lynti ha kaban lah pynbeit noh ia ka kam ba iadei bad ka jingpynkynriah ia ki 342 tylli ki Longiing na Them Iew Mawlong.
Haba iakren bad ki nongthoh khubor, u Conrad ula ong “Ngi la jan dep artad ban iapynbeit ia ki lad ki lynti bad ngin sa lah ban pyndep noh kham kloi ia ka”.
“Ngi la don ha ka khep ba sah satang ban shim rai bad ki nongshongshnong ki dei ban iaroh ia kane bad nga thikna bad kular ia ki nongshongshnong ba ngi la shimkhia bha ia kane ka kam” ula bynrap.
Kane ka jingkynthoh jong u ala mih tang arsngi hadien ka jingjia pynbthei bomb IED ha Them Iew Mawlong bad ka jingkynnoh ba kane ka jaka kala pynijli ia ki paidbah ka Jylla.
U Conrad ula ong ba ki paidbah bad ka Jylla kin iaroh namar ka dei ka sien ba nyngkong eh ba kala don ka jingshimkhia da kano kano ka Sorkar ban pynkynriah ia ki nongshongshnong na katei ka jaka.
