Shillong, Lber 08: Ka Deputy Commissioner cum Chairman DAPRE, ka East Khasi Hills, kala pyntip ba ka jingshah dait ksew ki briew kala kiew bha hapoh ka District bad haduh 80% na ki jingshah dait ksew ki dei kiba jia ha Sor.
Ka pyntip ba ka jingshah dait ksew kala kiew manla u snem ha District da 2512 tylli ki case ha u snem 2022 bad 5085 tylli ki case ha u snem 2023.
Ka ong ba ka jingdait ne trot ki ksew ba pang rabi ka lah ban lam sha ka jingpang rabies ha ki briew kaba ktah ia ka jabieng bad u budlum bad ka dei ruh ka jingpang kaba lah ban shim ia ka jingim briew bad kaba lah ruh ban iada lyngba ki injek.
Namar kane ka jingkiew ka jingshah dait ksew ha ka District bad ka thong jong ka Sorkar India ban pynduhjait ia ka jingpang rebies ha ki ksew hapoh u 2030, ka District Joint Steering Committee on Rabies Elimination kan pynlong ia ka jingai injek ei ia ki ksew kynthup ki ksew ba ri ki briew bad ki ksew surok naduh ka 11 tarik haduh ka 18 tarik Lber 2024.
Kala pyntip ba ha ka 11 tarik, ka jingai injek kan long ha Govt Basic School, Mawlai Nongkwar, 12 tarik ha Nongmynsong Community Hall, 13 tarik ha Lawsohtun Community Hall, 14 tarik ha Madanrting Indoor Hall, 15 tarik ha DHS Complex, Laitumkhrah bad 18 tarik ha Umpling.
Kane ka khliehduh ka District kala kyntu ia ki briew ba ri ksew ba kin wan ialam ia ki ksew ba ki ri ban ai injek ha kine ki jaka bala buh khnang ban iada ia kine ki jingri jong ki, ki bahaiing hasem bad ki marjan marpa na ka jingpang rabies.
