Ba pyrshah ia ka Interview thepkam ka District Social Welfare Office ha Nongstoin
Nongstoin, Lber 08 : U Deputy Commissioner ka West Khasi Hills District Bah Garod LSN Dykes, ula pyntip ba ka Sorkar kala bthah ia baroh ki Tnad treikam/Board/Corporation ba kin pan briew na ka Employment Exchange haba ki don jingthmu ban thungkam contract ha kino kino ki kam kiba lait.
Kane kala mih kum ka jingpynshai halor ka jingpyrshah jong ki kynhun Sengbhalang ba khot interview thungkam contract ka Ophis jong ka District Social Welfare Officer ka WKH, Nongstoin myn ha ka 4 tarik Lber, 2024.
Lah ban kdew ba u Deputy Commissioner ula pynsangeh shuwa ia kane ka interview thepkam namar ka jingpyrshah jong ki Sengbhalang ba ka Ophis ka DSWO kala khot interview tang ia ki samla bala register kyrteng hapoh ka Exployment Exchange.
U Deputy Commissioner ula ong, la sngewthuh ba ki Sengbhalang ba pyrshah bad ki nongwadkam kim da tip bha ia ka jingtreikam, ka bynta bad ka kamram jong ka Employment Exchange bad ka jingbthah jong ka Sorkar ban pyndonkam ia ka jingshakri jong ka Employment Exchange.
Ula ong ba dei namar kane ka daw bala pynsangeh shuwa ia ka interview thep kam jong ka District Social Welfare Office ka West Khasi Hills.
U iathuh ba iaka Employment Exchange ka Nongstoin la seng ha u snem 1974 bad ka Employment Information Asst Bureau ha Mawshynrut la seng ha u snem 2011. Ka Employment Exchange ka Nongstoin kala ai ka jingshakri ia ki nongwadkam ka District la 50 snem.
Une u Khliehduh ka District u pyntip b aka don ka jingbthah na ka Sorkar sha baroh ki Tnad treikam/Board/Corporation bad kiwei kiwei, ba kin pyndonkam ia ka Employment Exchange ba kin jied ne phah ia ki kyrteng kiba ibit ban pyndap ne thungkam ha ki kam contract kiba lait.
Ula ong ba ka rai jong ki borkhmih ban pyndap ia ki kam kiba lait da kaba thung contract hapoh ka Ophis ka DSWO, WKH ka dei kaba iaid kat kum ka jingbthah jong ka Sorkar Jylla.
U DC ula pyntip ba dei halor kane ka nongrim ba ka DSWO ka WKH kala thoh sha u Asstt Employment Officer ka WKH ban phah ia ki kyrteng jong ki nongwadkam kiba ibit ban trei ha ki kam kiba lait kiba kynthup ia 2 tylli ki kam Gender Specialist, kawei ka kam Specialist in Finance Literacy, kawei ka kam Asstt Accountant, kawei ka kam DEO jong ka PMMVY bad kawei ka kam MIS.
