Imphal, Lber 02: Ban ialeh ban tehlakam iaka jingwan rung kyrthep ki briew kiba na ka ri Myanmar, ha ka sngi Thohdieng, ka ïingdorbar thawaiñ jong ka Manipur da kawei ka sur, kala mynjur ia ka Resolution ban kyntu ia ka Sorkar Pdeng ban pyntreikam ia ka National Register of Citizens (NRC) ha ka jylla.
Ka jylla Manipur ka don ia ka thaiñ khappud bad ka Myanmar kaba jrong 398 Km.
Ia katei ka Resolution la wanrah da u Myntri Rangbah la Manipur u N Biren Singh ban kyntu iaka Sorkar Pdeng ban pyntreikam noh ia ka NRC ha Manipur.
Haba pynpaw ha ka X, u Myntri Rangbah N.Biren Singh ula ong, “Mynta ka sngi ka Manipur Legislative Assembly kala shim ia ka sienjam ban pynskhem iaka Resolution kaba la mynjur ha ka 5 tarik u Nailar 2022. Kadei ka jingngeit skhem ka jong ngi, da ka jingpyntreikam ia ka National Register of Citizens (NRC) ha Manipur ka long kaba kongsan bha ban iada ia ka jylla bad ban noh synniang na ka bynta ka jingbha jong ka Ri”.
“Ka jingshim ia ka rai ban kyntu ia ka Sorkar India ban pynkloi ha kaban pyntreikam ia ka NRC ka pyni shai kdar ia ka jingskhem jingmut ka jong ngi ban pynthikna ba kan don ka jingshngain bad jingshongsuk ha Manipur. Nga kyntu ia baroh ki nongshong shnong ka Manipur ban kyrshan ia kane ka jingthmu na ka bynta ban tei bad ban pynlong ia ka jylla Manipur kaba khlain bad kaba kiew shaprang na ka bynta ki pateng kiban dang wan” ula ong.
Hadien ba u Biren Singh ula wanphai biang ha ka bor ha ka sien ka Baar ban ialam ia ka sorkar Manipur ha u Lber 2022, ka ïingdorbar thawaiñ ka Manipur kala mynjur ia ka Resolution ha ka 5 tarik u Nailar 2022 ban kyntu ia ka Sorkar Pdeng ban pyntreikam ia ka NRC ha ka jylla Manipur.
 ha ka jylla.){kind=link}