Shillong, Rymphang 28: U nongialam ka Congress Legislature Party (CLP) Bah Ronnie V Lyngdoh hynne ka sngi, u la pynpaw ka jingsngew skhem baka Party kan ioh jingjop biang iaka Shillong parliamentary Seat haka ilekshon MP Lok Sabha ka ban wan.
Haba kren sha ki lad pathai khubor, u Bah Ronnie u la ong ba kane kam dei ka sien ba nyngkong baka Congress kan iakhun pyrshah bun ngut ki kyrtong naka bynta ka Shillong Seat hynrei “Phi la iohi hi ka Congress ka ioh beit ka jingjop namar ki paidbah ka rilum Khasi bad Jaintia Hills ki stad ban jied”.
“Ki paidbah ki sngewthuh, lada phah da kiwei ki MP na kiwei ki National Party, Ngam tip haduh katno kin lah ban wanrah jingmyntoi iaka Jylla, Hynei lada phah da MP naka national party kum ka Congress, ki MP ki lah ban iakren iaki mat namar ym tang ki MP hynrei ka Party ruh ka ieng lang ban kyrshan iala ki MP” la ong u Bah Ronnie.
U Bah Ronnie u la ong baka jinshah rem u Bah Vincent Pala haka MLA ilekshon 2023 kam ktah iaka ilekshon Lok Sabha daka ba ong “U khlem rem bun ki Votes haka ilekshon MLA Sutnga-Saipung bad baroh ki tip kumno ka Politiks ka long ha Jaintia Hills.”
Haba kylli, u Bah Ronnie u la ong ba ki MLA kim lah ban pynthikna ba ki paidbah kin jied iano haka ilekshon MP.
“Haka ilekshon MP sha Lok Sabha, don uwei MLA naka Sorkar MDA u la ong ba ki don bun ngut ki MLA bad MDC bad kila thikna ban jop hynrei u kyrtong jong ki u la rem namar kane ki bala shah jied haki paidbah kim lah ban pynthikna ba ki paidbah ki jied iano haka ilekshon MP. Mynta ka kynti ruh ki paidbah ka Meghalaya kin jied iaka Party ka ban pyrshah iaka UCC, CAA bad iaka Party kaba ieng ban ialeh pyrshah iaka jingshah leh donbor ki rit paid bad ki rit niam” u la ong.
Haba iadei bad ka jingpynslem ka Sorkar Pdeng ban pynurlong iaka Resolution bala mynjur daka ïing dorbar ban pyntreikam inner line permit (ILP), u Bah Ronnie u la ong “Kane ka pynpaw ba kim shim khia ban iada iaki rit paid ka Meghalaya. Kane ka jingdawa kam dei ka jingdawa hapoh surok hynrei kadei kaba la mynjur daka ïing dorbar jong ka Meghalaya. Kane ka pyni baka BJP kam khein snep wat iaka ïing dorbar. Kane ka pyni ka jingsynshar donbor ka BJP”.
Naka liang u MLA ka Gambegre Saleng A Sangma u la ong baka Congress kan bteng ban iakhun iaka jingdawa ban ioh jingithuh iaka ktien Khasi bad Garo hapoh ka Eighth Schedule ka Riti synshar ka Ri India bad ka jingpyntreikam ILP ha Meghalaya.
