Shillong, Rymphang 27: Ka Myntri ka Koit ka Khiah ka Kong M Ampareen Lyngdoh hynne ka sngi Baar kala buh ia u mawnongrim ban kyntiew kyrdan noh ia ka Sawsymper Sub- Centre sha ka Sawsymper Primary Health Centre (PHC).
Ha kane ka prokram buh mawnongrim la iadonlang u MLA ka Mawsynram u Bah Ollan Singh Suin, DHS (MI) Dr R Lyngdoh, DMHO East Khasi hills District Dr S.A Lyngdoh bad kiwei kiwei ki ophisar.
U Bah Ollan Singh Suin ula pynpaw ia ka jingsngewnguh ia ka Kong Ampareen Lyngdoh ba kam shym la kyrngah ban wan ban buh ia u mawnongrim ban kyntiew kyrdan ia ka Sawsymper Sub- Centre sha ka PHC.
Ula iathuh ba man la ka por u ju leit sha ka ophis jong ka Myntri ban iakren bad ban pynkynmaw halor ka jingdonkam ki paidbah jongka Constituency bad ula ong ba udei tang ka sur jong ki paidbah bad baroh ka shong pat ha ka myntri ba kan pynurlong bad hynne ka sngi la lah ban pynurlong ia ka jingangnud jong ki paidbah ka thaiñ.
Ka Kong Ampareen Lyngdoh haba kren kum ka kongsan kala ong ba ka sorkar jylla ka iengskhem ha kaban pynthikna ban ai ia ka jingsumar kaba paka ia ki paidbah bad ka PHC kadei kawei na ki jingshimkhia ban ai ka jingsumar kaba bha kaba ki paidbah ki lah ban ioh ha ka nongbah bad ha ki thaiñ nongkyndong.
Ka Myntri kala ai khublei ia baroh kiba donbynta ha kaban pynurlong shisha ia kane ka jingangnud jong ki paidbah ka Sawsymper bad ki jaka kiba marjan bad kala kyntu ia ki nongpyniaid bad nongtrei ba kin treishitom bad ban iatreilang kum ka kynhun ha kaban ai ka jingshakri kaba bha tam ia ki paidbah ha ka jingai jingsumar sukher.
Kala kyntu ruh ia ki Rangbah Shnong jong baroh ki shnong ba kin iatrei ryngkat bad ka tnad bad kala ong ba ka tnad ka don ia ka jingkhmih lynti ban pynurlong ia ka jingthmu ka jongki kum ka jingiasoi bad ka jingaiti ia ka jaka hapoh ka shnong.
Kala iaroh ruh ia u MLA ka thaiñ uba ju wan ban iakynduh iaka man la ka por ban pynkynmaw shaphang kane ka prokram kaba long kaba kongsan bha na ka bynta ki paidbah jong katei ka thain bad kala kyntu ruh iaki kmie ki kpa ba kidei ban mih sha kane ka jaka sumar na ka bynta ka bha ka miat jong ki khun jong ki.
Ka Myntri kala pynthikna ruh ia ki paidbah ba ka sorkar kan pynbiang ia ki jingdonkam ha kaban pynbiang ia ki nongtrei, ki tiar ki tar bad ka jaka sah jong ki doctor bad ki nongtrei.
