Shillong, Rymphang 26 : Ka Hynniewtrep Youth Council (HYC), ha ka sngi Nyngkong, kala dawa ban thung ia ka jingtohkit bad ban sospon ia u 2nd Officer Incharge ka Pynursla Police Station Bah George Dkhar, halor ka jingkynnoh ba u kren tohmet bad shoh ia arngut ki dkhot ka seng ha Pynursla Police Station myn ha ka sngi Saitjain.
Lah ban kdew hangne, ha ka 24 tarik Rymphang, ki dkhot ka HYC Ri War Mihngi Circle (Pynursla Sub-Division), kila kem ia artylli ki trok kiba kit masi bann khaii tuh sha Bangladesh. Hadien ka jingkem ia kine ki trok, kila ialam ia ki sha Pynursla Police Station da ka jingthmu ban ujor ejahar bad ban kyntu ia ki Pulit ba kin leh ia kaba donkam kat kum ka ain.
Hynrei la kynnoh ba haba poi ha Thanad, u 2nd Officer Incharge ha ka jaka ban sngap ia ka jingujor, ula kren tohmet bad kynhied pynban ia ki dkhot ka HYC bad hadien ula patom bad ktah kti ia ki haduh ba kila mynsaw.
“Ki Pulit kiba don ha thanad hapoh ka jingialam uwei u heh Pulit Bah George Dkhar, ha ka jaka ba kin sngap ia ka jingujor jong ki dkhot jong ngi bad register ia ka jingujor, kila sdang pynban ban tim bad patan ia u Lamphrang Khonglam shapoh ka thanad bad sa shoh sa bom ia u haduh ba ula mynsaw” ong ka HYC ha ka kyrwoh.
Ka HYC kala kynnoh ruh ba une u Heh Pulit ula byrngem ia ki dkhot ka HYC ban leh da kaba tyngeh namr ka jingkem ia ki kali kit masi.
“Baroh ki dkhot kila shah shoh dusmon hapoh ka thanad kata ym tang da ka kti hynrei la pyndonkam da ki ‘lathi’ ban bom ia ki bad kumjuh ruh la knieh wat ia ki nongkynti jong ki kata ia ki mobile phone, ki bek pisa bad kiwei kiwei” ong ka HYC.
Ka kynhun ka HYC ba ialam da u President Roy Kupar Synrem kala leit ban iakynduh ia u Superintendent of Police (SP) ka East Khasi Hills ban aiti ia ka jingujor, kaba dawa ban pynlong ia ka jingtohkit bad ban sospon noh mardor ia une u heh pulit uba donkti ha kane ka jingleh donbor katba dang iaid ka jingtohkit.
