Shillong, Rymphang 26: Ka Sorkar Meghalaya kala pynkha haduh 2.3 lak tylli ki kam tang ha kine ki lai snem bala leit noh bad ka don jingthmu ban pynkha sa 1 lak tylli ha kine ki shisnem ban sa wan.
Ia kane la pyntip da u Myntri Rangbah ka Jylla Conrad K Sangma hynne ka sngi Nyngkong ha Iingdorbar Thaw Ain haba iathuh ba ka jingbym iohkam ha Meghalaya mynta ka long 3%, kaba duna ia ka National average ba kpt 4.7%.
Ula ong ba ka Sorkar Jylla kala pyntreikam ia ki skhim/prokram bapher bapher ban plie lad ia ka ioh kam iohjam ia ki nongshongshnong. Kine ki kynthup ia ka MGNREGS, CM-Elecvate, PRIME Program, FOCUS, FOCUS+, ki Mission ha ka rep kr iang, ka Meghalaya Grassroot Music Project, Chief Minister’s Youth Centre, National Rural Livelihood Mission bad ka Skill Meghalaya.
“Da khein kyllin, ka jingpynkha kam lyngba kine ki prokram bapher bapher ka kot haduh 2.3 lak tylli ki kam ha kine ki lai snem bala leit” ong u Conrad.
Haba pynpaw ba ka Sorkar kala buh ia ka thong ban pynkha haduh 5.5 lak ki kam ha kine ki san snem ban wan, u Myntri Rangbah ula ong “Lada shu khein malu mala, ngin pynkha kumba 1 lak ki kam ha une u snem ban wan”.
Nalor kane, u Myntri Rangbah ula pyntip ba palat 3000 tylli ki kam la pynkha ha ki kam Sorkar bad kine ki kynthup ia 500 tylli ki kam doktor bad 30 ki nos bad technical staff lah dep ban thung hapoh ka Tnad ka Koit ka Khiah, 1000 tylli ha ka tnad Pulit bad 1000 tylli ha ka kam nonghikai.
Hynrei ula ong ba nalor kane, la pynkha ruh ia ki kam ha ki District hynrei ym don jingkhein pat katno tylli ki don.
Nalor kane, u Myntri Rangbah ula pyntip ba ka Sorkar kala buh ia ka thong ban pynkha ia palat 2.5 lak ki kam ha ka kam rep kam riang ha kine ki 4-5 snem ban wan.
Ula ong ba ka NRLM kala dei ka model ba jop ha kine ki san snem bala leit noh ha kaba ka Sorkar kala lah ban pynkha ia 1 lak ki kam na ka bynta ki kynthei bad kan pynkha ruh sa 1 lak ki kam ha kine ki 4 snem ban wan bad bynrap ba ha ka Skill Meghalaya, 1.2 lak ngut ki briew kila ioh jinghikai pyntbit ha kaba 50% kin sa ioh kam.
Ula ong ba ka kam jngoh kai ruh kan aikam ai jam ia kumba 50,000 ngut katba ka CM-Elevate kan pynkha ia palat 50,000 tylli ki kali bad ka IT kan pynkha 20,000 ki kam. Sa 10,000 tylli ki kam kin long ha ki prokram bapher bapher ka Sorkar.
“Kumta, ngin sa kynjoh ia ka 5.5 lak ka jingpynioh kam ha kine ki san snem ban wan” bynrap u Conrad.
Haba iadei bad ka jingthungkam da ki District Selection Committee (DSC), u Myntri Rangbah ula ong ba kam long satia kaba shisha ba ki DSC kin shym la khot thep kam namar kila pyniaid beit ia ka jingthungkam watla kam dei eh kaba bun.
