Kam iahap ban khein ia ki karkhana kum ki ‘Kang’
Shillong, Rymphang 23 : U Myntri Rangbah ka Jylla Conrad K Sangma ha ka sngi Thohdieng, ula kular ban sa shong bishar hi dalade ia ki aplikeshon jong ki 5 tylli ki karkhana coke kiba dang ioh Consent to Establish (CTE) thymmai na ka Meghalaya State Pollution Control Board (MSPCB) bad ong ba ka Sorkar kan leh iakaba donkam lada shem ba ki pynkhein ia ki kyndon.
U Conrad ula ong ba kam dei satia ban shu khmih beit ia ki karkhana coke ne ki karkhana kum ki “Kang” (villains) namar ka Jylla ka donkam ia ka roi ka par ha ka ioh ka kot da kaba wanrah ia ki jingkynshew kam bad pynmih kam ia ki nongshongshnong.
U Myntri Rangbah ula pynpaw ia kane haba jubab ia ka zero hour notice bala wanrah da u MLA ka UDP na Mookaiaw Bah Nujorki Sungoh hapoh ka Dorbar Mang tyngka hynne ka sngi.
U Bah Nujorki ula pynpaw ia ka jinglynngoh ia ka rai jong ka MSPCB ban ai CTE thymmai ia san tylli ki karkhana coke hapoh East Jaintia Hills. Ula kynnoh ba shuwa kane, ka MSPCP kala kyntait ia ka aplikeshon jong ki lai tylli napdeng kine ki san tylli ki karkhana coke da kaba ong ba ki jaka bala tyrwa ban buh karkhana kim iahap satia haba bynrap ba baroh san tylli ki karkhana ki dei kiba la pynhap ha ka thup kum kiba pynkhein kyndon.
Haba kren halor ka jingktah jong ki karkhana coke ia ka mariang, u Bah Nujorki ula ong “Ym sngeew phyla ba la pynman ia ngi kum ka Nongbah jong ka jingpang bampong (Cancer Capital)”.
Haba jubab, u Myntri Rangbah ula ong ba ki don da ki kyndon ba hap bud bad kam mih satia ka jingkylli iano iano ruh ba kan don ka jingpynkhein ia ki kyndon bad lada ki pynkhein, ka ain ka don ban leit eiei pyrshah ia ki.
“Ai ba ngan kular ia u dkhot ba kane ka dei ka mat, kaba nga sngewjan bha bad ngan sa shimkhia hi shimet ia kine ki kam bad ngan sa pule hi ia baroh ki aplikeshon bad wad ia kine ki jingdonkam ba hap ban pyndep. Ngan sa khot ia ka jingialang ha ka kyrdan jong nga bad ka MSPCP bad ngan sa pyntip sha u dkhot (halor kane)” ula ong.
Hynrei u Conrad ula ong “Lada kam don ka jingpynkhreh ia ki kyndon ne ki jingdonkam ba hap ban pyndep, ngim lah satia ban kyntait iano iano ruh ba kin pyniaid shakhmat ia ki kam jong ki. Lada ngi shem hangno hangno ba ki pynkhein, nga kular ba yn leh tyngeh kat kum ka ain”.
