Shillong, Rymphang 22 : U MLA ka TMC na Nongthymmai Bah Charles Pyngrope ha ka sngi Palei, ula dawa ia ka Sorkar Jylla ba kan shim ia ki sienjam ba donkam ha kaban pynsangeh ia ki jingshah thombor bad shah pyndik ki Khristan.
Haba wanrah ia ka zero hour ha Iingdorbar, u Bah Charles ula pyntip ba kane ka jingdawa kala mih halor ka jingjia ha kaba kawei ka Sister Rose Mary na Siju, South Garo Hills, kala shah tim sha tla da ki ktien khlem akor bad shah bret nalor k abos ha Assam katba ka dang leit na Duhnoi sha Goalpara dang shen.
“Ka jingpyndik ia ki briew tang namar ba ki phong ia ki jain ne jingdeng niam ka dei ka bym lah pdiang, bym pat ju iohsngew bad ka bym iahap satia…kum kine ki jingjia kila jia namar ki jingkren sniew bad jingkynshoit pyrshah ia kane ka niam” ula ong haba kyrpad ban leh eiei mar dor da kaba ong “Nga sngew ba ka Sorkar ka dei ban shim ia ki sienjam kat kaba lah ban tehlakam ia kine ki jingkren sniew”.
Haba jubab, u Myntri Rangbah Conrad K Sangma ula ong ba haba ioh jingtip ia kane ka jingjia, ula krem mar mar ia u Myntri Rangbah ka Assam Himanta Biswa Sarma hynrei ula ong pat ba ki jingtip bala ioh ki dei ki bym pat biang satia ban buddien bha da ki bor ka Sorkar.
“Ngi dang ap ia ki jingtip kiba bniah namar ia mynta, ki jingtip ba ngi dang ioh ka dei tang ka sngi bad ka por lem bad ka jaka ba ka leit. Ngim don jingtip ia ka nombor jong ka bos ne kano kano, kaba lah ban lam ia ngi sha kine ki briew ba donkti” ula ong.
Ula ai ka jingkular ba ka Sorkar kan pyrshang khlem sangeh ban pynthikna ba kum kine ki jingjia kin ym jia shuh ha kano kano ka jaka jong ka Ri.
U Conrad u iathuh b aula dep ruh ban ai jubab da ka jingthoh halor kane ka jingjia hadien ba ula ioh ia ki jingtip ia kaei kaba jia.
