Shillong, Rymphang 22 : Ka Iingdorbar Thaw Ain ka Jylla kala kyntait ban pdiang ha kaban iatai ia ka breach of priviledge motion bala wanrah da u MLA ka VPP Bah Adelbert Nongrum pyrshah ia u Lamphang namar ka jingbym shah ban iatai ia ka kaiphod CAG hynne ka sngi Palei.
“Ki bym pdiang (no) kila jop, ia kane ka privilege la kyntait da ka Iingdorbar” ong u Lamphang Thomas A Sangma hadien bala buh ia ka motion ha ka jingia vote.
Haba kdew ia ki rules, u Lamphang ula bynrap ‘Lada mih kano kano ka jingartatien ia ka jingbatai ia kano kano ka kyndon jong ka rule, ka rai jong u Lamphang ka dei kaba khatduh. Kane ka dei ka rai jong nga”.
U Bah Adelbert ula aiti ia ka jingujor breach of privilege hynne ka sngi pyrshah ia ka rai jong u Lamphang ban nym pdiang ia ka special motion jong u, ban iakren halor ka kaiphod jong ka Comptroller Auditor General of India (CAG) on social and economic sector jong u snem ba kut ha ka 31 tarik Lber 2022, da kaba ba ia ka hok jong u la kyntait.
Halor kane, u Lamphang ula ong “Ka Assembly Secretariat kala pyntip ia u (Adelbert) ba kat kum ka shithi bala iohpdiang na u Myntri Rangbah ka Jylla Conrad K Sangma ba ong bahadien bala wanrah ia ka kaiphod CAG hapoh ka Iingdorbar, ka Public Account Committee (PAC) ka dei ban shong bishar ia ka (kat kum ka rule). Naba ka kaiphod ka dang don hapdeng ka jingbishar ka PAC, nga kyrpad ia phi ban nym buh ia kane ka motion ha ka thup ban iakren. Nga sngew ba kane ka dei ka jingpynman bakla ia ki rule, ka dei kaba lah ban iakren ia ka kaiphid hadien ba la aiti ka PAC ia ka kaiphod sha ka IIngdorbar”.
Haba wanrah ia kane ka motion shuwa kine kiei kiei, u Bah Adelbert ula ong ba ia ka hok jong ki MLA la pynkhein da u Lamphang da kaba shim rai ban nym shah iakren ia ka motion hapoh ka Iingdorbar halor ka kaiphod CAG.
“Ngi don ia ka hok ban iakren ia ka kaiphod CAG sha u paidbah bad ha ki lad pathai khubor, kumno u Lamphang um shah ia ngi ban iakren hapoh ka Iingdorbar” ula ong.
