Shillong, Rymphang 20: Ka North East Regional Domestic Workers Union (NERDWU) bad ka All Meghalaya Domestic Workers Union (AMDWU) hynne ka sngi kala dawa naka Sorkar Jylla ban thaw daka ain ban iada iaki kynthei kiba bylla ha ing briew.
Haba kren shaki lad pathai khubor ka vice president jong ka AMDWU ka Kong Elbina Nongkhlaw kala ong baka ka jingdawa ban thaw daka ain ka long ban ioh ki lad jingiada naka bynta ki para kynthei kiba trei bylla ing briew.
Ka Kong Elbina kala ong seng ka dawa ruh naka Sorkar Jylla ban ai jingithuh iaki kynthei bad iaki kam kaba ki trei ha ing briew.
Kala ong baka Sorkar Jylla kala ithuh iaki nongtrei bylla ing briew kum ki nongbylla (Labour) hynrei haduh mynta kam pat ithuh iaki kam, kaba ki trei man ka sngi.
“Ka jingdawa naka Sorkar Jylla ban thaw daka ain naka bynta ki nongtrei bylla ing briew kadei kum shi bynta ban ai jingiada daka ain bad haka juh ka por ban ioh ki lad jingmyntoi naka Sorkar iaki para nongtrei kiba bylla ing briew” la ong ka Kong Elbina.
Ka Kong Elbina kala iathuh ba ki don kumba 3000 tam kiba la pynrung kyrteng ialade hapoh ka AMDWU bad naka liang ka Union naduh 2012-2013 kala ju pynsngew shaka Sorkar Jylla ban thaw daka ain naka bynta jong ki hynrei haduh mynta ka Sorkar kam pat jubab shaka Union.
Kala iathuh ruh ba ka Union kala dawa ruh naka Sorkar Jylla ban pynrung iaki nong trei bylla ing briew hapoh ka Wage Board ban ioh ka jingsiew kaba biang.
“Ngi la pynmih iaka Wage Card bad ki don ki dkhot kiba la ioh jingsiew katkum ka Wage Card hynrei Salonsar kane ka Wage Card kam pat treikam bad dei namar kane ki dang bun ki ba bylla ing briew kiba dang ioh ka jingsiew kaba rit bha” kala ong.
Nalor kane ka nongialam ka AMMDU kala ong ba ka jingdon da ka Wage Board, kan iarap iaki nongtrei bylla ing briew, namar lyngba kane ki nongtrei ki ioh ka jingsiew kaba ryntih bad ka bai lutksan haka por shitom bad kiwei kiwei de.
