Shillong, Rymphang 20 : U Myntri Rangbah ka Jylla Conrad K Sangma ha ka sngi Ba-ar, ula kular ba ka Sorkar kan sa shong bishar ia ka jingtyrwa ban wanrah noh da ka Minimum Support Price (MSP) ia u kwai.
Hynrei u Conrad ula ong ba ka dor jong u kwai bala thad tyrkhong u iaid iew palat 10 shah ia ka dor bad bynrap “Kumta, ka jingpynmih mar da u kwai ka dei ka lynti ban pyniaid shakhmat”.
U Myntri Rangbah ula kren ia kane haba jubab ia ka jingkylli bala wanrah da u MLA ka UDP na Amlarem Bah Lahkmen Rymbui, uba la kyrpad ia ka Sorkar ban pyrkhat lem ha ka ban wanrah da ka MSP ia u kwai.
U Bah Rymbui ula ong ba ka dor jong u kwai kala hiar bha bad kane kala lam sha ka jinghap pynmih bun u kwai bad duna ka jingioh ia ki nongrep.
Ula kren halor ka notification bala pynmih da ka Sorkar India ha u 2020 ba buh ia ka MSP ia u kwai ha ka dor ba T. 200.
Haba pynpaw ia ka jingsngewhun ia ka jubab u CM, u Bah Rymbui ula kyrpad ia ka Sorkar ban pyrkhat noh ha kaban buh ia ka processing unit ha Amlarem ban kyntiew ia ka jingpynmih kwai bad jingpyniaid iew.
U Conrad ula pyntip ba artylli na ki 46 tylli ki processing unit kila don ha Amlarem. Ula ong ba jan kumba T. 41 lak la kynshew pisa nalor ka T. 1 klur kaba la dep ban pynlut.
Haba jubab shuwa ia kane, ka Myntri kam rep ka Jylla Kong Ampareen Lyngdoh ka pyntip ba 46 tylli ki processing unit ba kynthup ia ka working shed, de-husking machines, solar tunnel dryers bad soaked pits la dep ban shna ha ki 21 tylli ki Block jong ki 10 tylli ki District. Ka jingpynlut ia kine kala kot haduh T. 14.06 klur.
Ka pyntip ba 34 tylli ki Unit kila dep mynta bad kaba sah ka long 12 tylli ia kiban sa pyndep noh ha kine ki khyndiat bnai ban wan.
 ia u kwai.){kind=link}