Shillong, Rymphang 20 : Ka Sorkar Jylla kala mang pisa haduh T. 338 klur ban pyntrei ia ka Tura Smart Town bad kala mang ruh ia ka pisa ba T. 79 klur na ka bynta ka sor Jowai.
Haba jubab ia ka jingkylli jong u MLA ka Nongstoin Bah Gabriel Wahlang, u Myntri Rangbah Conrad K Sangma ula ong ba ki artylli ki Smart Town ka Jylla ki dei ka Tura bad ka Jowai.
U Myntri Rangbah ula pyntip ba ka pisa baroh bala mang ia ka sor Tura ka long T. 338 klur katba ia ka Jowai la mang T. 79.8 klur.
Haba wanrah ia ka jingkylli bynrap. U Bah Gabriel ula kyntu ia u Myntri Rangbah ban kynthup lang ia ka Nongstoin hapoh ka Smart Town Project.
U Conrad ula pyntip ba ka Sorkar ka angnud ban kynthup ia baroh ki District Head Quarter hapoh ka Smart Town Project bad ia kane yn sa leh da ki pali pali watla kam pat don satia ka plan ia kane.
