Shillong, Rymphang 19 : U Myntri Rangbah barim ka Jylla Dr Mukul Sangma ha ka sngi Nyngkong, ula bthah ia ka Sorkar MDA ba kan sangeh noh ia ka jingle politics bad ka Meghalaya Residents Safety and Security Act (MRSSA), kaba thmu ban tehlakam ia ka jingrung kyrthep ki bar jylla bad poi wir hapoh ka Jylla.
Haba iashimbynta ha ka jingiatai ia ka jingkren u Lat, u Dr Mukul ula ong ba ka MRSSA ka dei kawei na ki ain ba biang bha kaba don ha kane ka pyrthei ban tehlakam ia ka jingrung kyrteng ki bar jylla bad ki poi wir. La mynjur lang ia ka da ka Iingdorbar Thaw Ain ha ryngkat ka jingiadon bynta lang jong ki kynhun bapher bapher ha ki snem bala leit noh.
“Kiba bun ki ri kynthup ka USA, UK ki dang wad ia ki lad ki lynti kumno ban tehlakam ia ki poiwir namar ba kim don satia ia ka ain kum kane” ula ong haba bynrap “Nga kwah ban kyntu ia baroh kynthup ka Sorkar ba kan khein kongsan ia kane ka ain ba donkam, kaba la wanah na ka bynta ka bit ka biang jong ka Jylla. To ngin ym ialeh politics ia kane”.
Une u Myntri Rangbah barim ula kynnoh ba ia kane ka ain la set ha ka duli pjah naduh u snem 2018 namar “Ngi rai ban ialeh politics bad kane ka ain, kaba ktah ia ka bha ka miat jong u paidbah”.
Nalor kane, une u Myntri Rangbah barim ula maham ia ka Jylla ba ka bamsap ka dei kaba kham shyrkhei bad ktah ban ia ki kam lehnoh, kaba lah ban ialam sha ka lawei ka jingjot.
Haba kren halor ka jingtih dewiong beain bad khaii beain, ula buh jingkylli la ka Sorkar ka nud ne em ban thung ia ka jingtohkit ba laitluid bad ong ba ka jingleh bym hok kat kane ba jia mynta kan ym jia satia khlem ka jingtip jong ki briew kiba don ha ka bor.
