Shillong, Rymphang 16: Kan long ka sngi sah jingkynmaw ha ka histori jong ka Jaidbynriew Khasi ba ka nam jong u Khla Wait Tirot Sing Syiem, uba ka Jaidbynriew ka niewkor bad niew burom kum u Nongiakhun Laitluid pyrshah ia ka Sorkar Bilat, kam kut shuh tang hapoh ka Ri-lum Khasi.
U Tirot Sing Syiem mynta ula ioh jaka bad ka jingithuh wat hapoh ka Ri Bangladesh, ka jaka kaba u pynsad mynsiem khatduh eh ha kane ka sla pyrthei. Kane ka jingiathuh kala wan ha ka dur jong u motdur sahnam uba la pynieng hapoh ka Indira Gandhi Cultural Centre ha Dhaka, Bangladesh.
Ia une u motdur saham jong u Tirot Sing Syiem la plie paidbah ha ka sngi Thohdieng da u Hingh Commissioner ka Ri India sha Bangladesh u Pranay Verma bad u Symbud Myntri Rangbah ka Jylla Bah Sniawbhalang Dhar ha ka jingiadon ryngkat u Myntri ka Tnad Arts & Culture Bah Paul Lyngdoh, Myntri ka Koit ka Khiah Kong Ampareen Lyngdoh bad kiwei kiwei ki kynrem ki lyndan.
Ha kane ka sngi, la plie paidbah ruh ia ki khana da ki jingthoh dur ba batai ia ka jingim jong u Tirot Sing Syiem, kiba la wah ha ki kynroh jong ka Indira Gandhi Cultural Centre (IGCC). Nalor kane, ia ka Indian Council Cultural Centre Library ruh la ai kyrteng noh sha ka U Tirot Sing Library ban pynsahnam ia une u Khla Wait.
U Syiem ka Hima Nongkhlaw Phrester Manik Syiemlieh, Syiem ka Hima Bhowal Kyrsaiborlang Syiem bad kiwei kiwei ki Khlieh Nongsynshar kila iadon ryngkat ban sakhi ia kane ka sngi sah jingkynmaw.
Kane ka jingplie ia u motdur ba sah khana ka dei u soh jong ka jingiatreilang bala lamkhmat da ka Tnad Arts & Culture ka Jylla ha ryngkat ka jingkyrshan ka Ministry of External Affairs (MEA), ka Indian High Commission ha Dhaka, bad ka Indian Council for Cultural Relation (ICCR) bad ka IGCC.
Lah ban kdew hangne ba u Nongshna motdur ba paw ka Jylla bah Raphael Warjri u dei uba pynwandur ia une u motdur bad ia ki khana thohdur jong une u Khla Wait.
Ka Tnad Arts & Culture kala pynlut haduh T. 11 lak ban leh ia kane ka kam bakhraw ban pynsahnam ia u Tirot Sing.
Ha ka por janmiet, la pynlong pat ia ka cultural prokram halor ka matpdeng “ U Syiem Tirot Sing – U Khla Wait Ka Ri Khasi” kaba la pynlong ha Jatiya Natyashala Milanayatan, Bangladesh Shilpakala, Shegun Bagicha ha Dhaka.
Ia kane ka prokram la pynlong da ka IGCC, Dhaka bad ka Tnad Arts and Culture ha ryngkat ka jingiatreilang bad ka Bangladesh Shilpakala Academy.
