Shillong, Nailar 1: Ka Kynhun Anti-Narcotics Task Force (ANTF) jong ki Pulit ka West Garo Hills hynne ka sngi, kala ioh ban kurup haduh 10.53 gram u heroin na ka met jong uwei u Pulit Langrut ba tip kyrteng u Ajay Chettri.
Une u droks u dei uba phah da uwei pat u nongkhaii drok ba kyrteng u Khrawbok Diengdoh ba na Dongkamon, Nongmensong, ia uba ki pulit kila dep ban kem.
Ki Pulit kila kem ruh ia u Nongbud bad u trai jong kawei ka bos night super ba kyrteng u Arup Nag ba na Upper Babupara, Tura, Suresh Burman (59) na Beldarpara, Tura bad u Shankar Dalu (33) na Mukdangra, Garobadha ban tohkit halor kane ka kam.
Ki Pulit ANTF kila kurup ia kawei ka mobile phone bad ka sim card, ka bos ML-08E-6111 bad kawei ka Maruti Suzuki Car AS-01AB-6116.
Halor u Pulit Langrut u Ajay Chettri, ka Tnad Pulit kala sospon ia u na ka kam, ong ki heh Pulit.
Da ka jingpyntip ki Pulit ka West Garo Hills, ki Pulit ka Nongbah Shillong kila hiar khynra ia ka iingsah u Khrawbok bad ioh kurup katto katne u droks heroin na ka met jong u.
