Shillong, Rymphang 06: Ka Meghalaya kala bteng ban jop 5 sien lynter ha ka U-23 Men’s Col CK Nayudu Trophy plate group da kaba pynrem hynne ka sngi baar iaka Nagaland da 134 run ha ka jingialehai kaba la long ha MCA Ground, Shillong.
Ka Meghalaya hynnin ka sngi kala leit ban tied ha ka sien ka baar bad kala kamai
78 run bad hap 6 wiket bad hynne ka sngi kala bteng biang ban leit tied bad kala kamai 106 run bad hap lut baroh ki nongtied bad dei tang u Nishanta Chakraborty marwei uba la tied bha da kaba kamai 57 run khlem out.
Ka Nagaland kala donkam ban kamai 328 run ban jop iaka jingiakhun hynrei kala kamai tang 193 run bad hap lut ki nongtied bad kala pynlong iaka Meghalaya ban jop da kaba suk.
Ka Meghalaya kala kamai 295 run haka jingleit tied kaba nyngkong katba ka Nagaland kala kamai tang 74 run bad ka Meghalaya kala tam da 221 run bad haba ka Meghalaya kala leit tied ha ka sien ka baar kala kamai 106 run bad kala tam da 328 run hynrei haba ka Nagaland kala leit tied ha ka sien ka baar kala kamai tang 193 run.
U nongtied jong ka Nagaland u Afzal ula kamai 58 run katba u Sujal Prasad ula kamai 32 run.
U Nongkawang bol ka Meghalaya u Manish Sharma ula shim 4 wiket, u PM Santhosh ula ioh 3 wiket katba u Badonnam Mylliemngap bad u Bipin Kumar Ray kila ioh mar 1 wiket.
Ka Meghalaya kala jop 5sien ha ki 5 tylli ki jingiakhun bad kala long ka lahduh ha ka round robin stage jongka plate group da kaba kamai 31 point, katba ka Nagaland kaba la mad ia kane ka jingrem kaba nyngkong kala wan ha ka kyrdan ka baar da kaba ioh 25 point.
Ka Meghalaya mynta ka dang ap ia kiwei pat ki jingiakhun kiban long ha kine ki sngi ban tip badno kan iakynduh ha ka Semifinal kaban long ha Shillong naduh ka 11 tarik u Rymphang.
