Shillong, Rymphang 06: U Nongialam ka Liangpyrshah ka ïingdorabr thawain Bah Ronnie V Lyngdoh hynne ka sngi Ba-ar, ula pynksan iaka rai jong ka Sorkar Jylla ban pynjlan iaka samoi treikam jong ka Khasi Hills Autonomous District Council (KHADC) bad Jaintia Hills Autonomous District Council (JHADC) sa 6 bnai.
U Bah Ronnie ula ong “Nga sngew ba kala don palat lane ym duna iaka 30 snem ba kam don satia ka Delimitation lane ka jingpynbeit iaki constituency jong ki MDC ha kine ki artylli ki District Council”.
Haba ai nuksa iaka jingiapher ka jingdon briew ha ki Constituency u Bah Ronnie ula ong “Phi lah ban iohi ba ki don ki Constituency kiba don bun ki nongthep Vote bad don pat ki Constituency kiba duna bha ka jingdon ki nongthep Vote. Ka nuksa ka long ka Laban kaba don 12,000, ka Mawlai pat 50,000 bad ka Mylliem 36,000”.
U Bah Ronnie ula ong ruh “Ngi la ai jingmut ruh iaka Delimitation, balei ba ym lah ban pyndon noh da ki juh ki Constituency naka bynta ki MLA bad MDC ban pyntyllun beit iaki kam ki jam lyngba ka jingiareilang hapdeng ki MLA bad MDC”.
Une u MLA ka Mylliem ula ai nuksa ia ka Lumparing ha kaba ha ka elekshon MLA ka hap sha Laban katba ka MDC pat ka hap ha Laitumkhrah.
“Ka Laitumkhrah MDC Constituency ka treikam naduh Lumparing shaduh Siejliej, kumno kane kan iahap. Ki paidbah kiba donkam ia u MDC ka Laitumkhrah ki dei na ki 4 tylli ki MLA constituency ba kynthup ia ka Laban, Laitumkhrah, Mawryngkneng bad Pynthorumkhrah” ula ong.
Haba iadei bad ka jingkam ba Voice of the People Party (VPP) baka jingpynjlan kadei namar ka Sorkar ka sheptieng, u Bah Ronnie ula ong “Kam dei ka sien ba nyngkong ba pynjlan iaka samoi treikam ki District Council haba ai nuksa ia ka jingpynjlan ia ka GHADC bad kane kam mut satia baka Sorkar ka tieng. Lada ym lah ban pynlong ilekshon mynta, lashai te hap pynlong beit. Kam mih ka jingkylli baka Sorkar ka tieng”.
