Shillong, Jan 30: Ka Meghalaya kala ialehkai bha pyrshah iaka Arunachal Pradesh ha ka jingialehkai Cricket jongka U-23 Men’s Col CK Nayudu Trophy ha kaba u Swatic Chettri ula kamai 190 run bad ym shim la Out satia bad mynta ka Meghalaya ka donkam ban pynhap dang kloi ia ki 4 ngut ki nongtied jong ka Arunachal ban ioh ia jingjop.
Ka Meghalaya kala leit tied nyngkong bad kala kamai 203 ha ka sngi sdang jong ka jingiakhun ha ka Sngi u Blei katba ka Arunachal kala kamai 224 run bad tam da 21 run.
Ka Meghalaya kala leit tied biang ha ka sien ka baar bad kala kamai 368 run bad hap lut ki nongtied bad ka Arunachal kala donkam ban kamai 348 run ban jop ia kane ka jingiakhun.
Ka Meghalaya hynin ka sngi kala kamai 208 run bad hap 6 wiket bad haba kala
bteng ban tied biang hynne ka sngi kala lah ban poi shaduh 368 run lyngba ka jingialehkai bha Swatic Chettri ula kamai 190 run khlem out bad u Bipin Kumar Ray ula kamai 53 run.
Haba ka Arunachal kala leit ban tied biang ban beh iaka 348 run hynne ka sngi, kala mad jingeh haba ki nongtied ki jongka kim shim lah satia ban kyrda slem bad ka Arunachal kala kamai 89 run bad hap 6 wiket bad ka donkam sa 259 run ban jop ia ka jingialehkai.
Ki nongkawang bol ka Meghalaya kiba kynthup ia u Abhishek Kumar ula ioh shim 3 wiket, katba u Manish Sharma, u Bipin bad u Sudhir Sahani kila ioh mar 1 wiket.
Ka Meghalaya kala lah ban pynhap kloi ia kine ki 6 ngut ki nongtied bad lashai ka sngi kin hap ban ialehkai bha ban pynhap kloi ia ki 4 ngut ki nongtied jong ka Arunachal ban jop ha kane ka jingiakhun.
