Shillong, K’lyngkot 30 : Ka Tnad Meghalaya Police kala maham ia ki paidbah ba kin long kiba husiar bha ialade na ki rynsan thok pisa lyngba ki kor Internet, kiba la kha roi mynta ha ki kyrteng bapher bapher.
U Superintendent of Police (City) ka East Khasi Hills Bah Vivek Syiem u pyntip ba mynta sa kawei ka rynsan kynshew pisa ha ka kyrteng jong ka Numgenious AI kaba don ia ka link https://numgenius-ai.vsisk.com kala sdang ia ki kam shukor hapoh ka Jylla.
U pyntip ba kane ka rynsan kala shukor ia ki paidbah da kaba pynbiej ba kin kynshew ia ka pisa jong ki ha kane ka rynsan bad kin ioh arshah laishah ia ka kamai na kaei kaba ki kynshew tang ha ka por ba lyngkot.
U bah Vivek u pyntip ba kila don katto katne ki case kiba la wan ujor sha ki Pulit ha East Khasi Hills tang ha kane ka taiew bala lah bad ka jingtohkit kala iaid mynta ban pynngat ia kine ki riew shukor.
Une u Heh Pulit u pyntip ba ia kane ka kam jyrsieh la leh lyngba ka whatsapp group ha kaba ki briew kiba kwah kamai pisa kloi, ki hap ban iawer iala ki paralok ban rung bad ban iadon bynta lang. Kane ka group ka ju pynmih ia ki skhim ba man ka kynta, man ka sngi, man ka taiew bad man ka bnai da kaba pynbiej ba ka pisa ba ki kynshew kan sa kha sut.
U ong ba hadien ba ki briew kila siew ia ka pisa sha kine ki riewshukor, kine ki briew kin ym ioh jubab shuh bad une u nongshukor u lah ban kylla ia ka kyrteng bad ia ka link ban nang ioh pynngop shuh shuh ia kiwei pat ki briew.
U Bah Vivek ula kyntu ia ki paidbah ba kin long kiba husiar ban nym ngop ha kum kine ki skhim thok bad ban pyntip ruh ia kum kine ki jait kam shukor sha ki Police Station ba marjan.
U ong ba ki paidbah ki lah ban pyntip sha ka Cybercrime helpline number 1930 bad ruh sha ka Police Control Room, Shillong ha u nombor 0364-2215427 lane 6009196479 ban ioh jingiarap.
