Nongpoh, Kyllalyngkot 30: Ki Dorbar Shnong ka thain Killing, Ri-Bhoi District kiba don ha ka synjuk All Killing Dorbar, kila ai ka jingkyrshan ia ka kompani Uranus Stone Product & Co ba kan plie ia ka jaka tylliat maw hapoh ka thain.
Kane ka sur jong ki Dorbar Shnong kala mih na ka Public Hearing bala pynlong da ka Meghalaya State Pollution Control Board (MSPCB) hynne ka sngi Ba-ar ha Umbuda Killing, ha ryngkat ki bor pyniaid District kaRi-Bhoi.
Ia kane ka Public Hearing la pyniaid da u Engineer ka MSPCB Bah S syiem, ADC ka Ri-Bhoi Kong Balakyntiew Ranee, EAC Bah Eric Kevin Dkhar.
U Nongmihkhmat ka All Killing Dorbar Nithil Marak haba ai jingkren, ula iathuh ba ki Dorbar Shnong ka thain Killing kiba don palat phew tylli, kila pynpaw ba kim don satia ia kano kano ka jingpyrshah ia ka kompani Uranus Stone Product & Co ba kan buh ia ka karkhana tylliat maw ha ka thain.
Ula ong ba kane ka jingbym pyrshah kala mih namar kane ka kompani kala kubur bad kular ban bud thik ia ki kyndon jong ki Dorbar Shnong kiba kynthup ia ka jingsumar ia ka mariang, aikam aijam ia ki nongshong shnong bad kiwei kiwei.
Ka Uranus Stone Product & Co, ka la pynshai bad iai ban ba ka kompani kan bud thik ia ki kyndon ain jong ka Sorkar jylla, ki ain shnong nalor ka jingburom ia ka mei mariang da kaba thung ia ki dieng ha ki shnong ki thaw bad ban aikam aijam ia ki nongshong shnong.
Ka HYC Ri-Bhoi bala mihkhmat da u samla RC Thangkhiew, kala pynpaw ba kam kyrshan satia ia ka jingthmu ban wanrah ia kane ka karkhana ha thain Killing bad ong ba lada mih kano kano ka jingujor na ki paid nongshongshnong, ka Seng kan sa leit ban ujor sha ki bor Sorkar, sha ka KHADC, sha u Deputy Commissioner bad u MLA bad MDC ka thain.
Ha kane ka jingialang, ka MSPCB kala ioh pdiang ruh haduh 158 tylli ki shithi na ki riew paidbah kiba ai jingkyrshan ia ka kompani ban buh karkhana tylliat maw.
Ka MSPCB bad ki bor District kin sa pynkhreh mynta ia ka kaiphod bad lum thup ia baroh kine ki shithi, na ka bynta ban phah sha ka Sorkar Jylla ba kan shim ia ka rai halor katei ka karkhana tylliat maw ka Uranus Stone Product & Co.
