Shillong, K’lyngkot 29 : Uwei u nong pahara (security guard) ba ap pahara ia ka jingkieng Umiam kaba dang don hapdeng ka jingtrei maramot, ula iap na ka jingshah lympat bording elektrik hynne ka sngi Nyngkong.
Une u Pulit pahara u kyrteng u Rishanlang Muktieh ba 25 snem ka rta, uba dei na ka shnong Lalsharai,Ri-Bhoi District.
Haba pynthikna ia kane ka jingjia, u Superintendent of Police (City) Bah Vivek Syiem u pyntip ba kane ka jingjia kala jia hynne ka step por 5:30 baje eiei.
U iathuh ba une u nong pahara ula shah bat elektrik ha ka por ba u dang leit tam dieng thang ding najan uwei u transformer uba don ha kane ka jaka.
U pyntip ba une u nong pahara u dei uba la wanrah da ka kompani ITD Cementation India Limited.
Kat kum ka khubor ba ioh lum, une u transformer u dei jong ka kompani ITD Cementation India Limited kaba ai bording ia ki kor ki bor jong ka kompani ban maramot bad tei pynkhlain biang ia ka jingkieng Umiam kaba dang iaid shaid shaid mynta.
Ia une u nong pahara la pynkit noh mar mar da ki paralok ba iadonlang, sha Shillong Civil Hospital hynrei hadien ula khlad noh na kane ka pyrthei.
