Shillong, K’Lyngkot 29: Ka Khasi Student Union (KSU) West Jaintia Hills District hynne ka sngi Nyngkong, kala leit ujor sha u Myntri ka tnat Pule Puthi Rakkam A Sangma pyrshah uwei nonghikai skul ba kynnoh ba u ju leit skul tang 23 sien haduh 33 sien eh haka shi snem.
Haba pyntip ia kane, u Education Secretary ka KSU WJH samla Hababiangki Biam ula iathuh ba une u Nonghikai u dei uba hikai hapoh ka skul Lower Primary School Larnai West Jaintia Hills.
U samla Hababiangki ula iathuh ba une u nonghikai ula ioh ka kam hikai ha kane ka skul haka 4 tarik Naitung 2013 bad ha une u snem la kynnoh ba ula wan hikai tang 33 sngi.
Ula iathuh ba ha u snem 2014, la kynnoh ba une u nonghikai u wan hikai skul tang 23 sngi bad naduh u bnai Jymmang 2014 ula sangeh syndon ban wan sha skul katba ia ka tulop pat u ju leit sei beit.
Ha u snem 2016 la kynnoh ba une u nonghikai ula sdang ban pep skul biang bad dei namar kane ula shah wengkam shipor ha u Lber 2017 haduh Naiwieng 2019.
U iathuh ba watla une u nonghikai u iai pep ban wan sha skul hynrei ula shah thung kam biang naduh u bnai Nohprah 2019 haduh mynta u snem 2024.
Halor kane, u samla Hababiangki ula iathuh baka seng ka dawa na u Myntri ka tnat Pule Puthi ban leh eiei pyrshah ia une u nonghikai namar ka jingpep wan shim klas ka ktah iaka pule puthi ki khynnah skul.
