Shillong, K’Lyngkot 25: Ka Khun Hynniewtrep National Awakening Movement (KHNAM) kala thoh daka shithi shaka Dorbar Shnong Rynjah ba kyntu ban pyndam noh iaka kyrteng ‘RR Colony’ na baroh ki Sign Board bad ban thoh noh daka kyrteng shnong tynrai kata ka Them Rynjah.
U Working President ka KHNAM Bah Thomas Passah ha ka kyrwoh ula ong ba ka Hima Mylliem naduh u snem 2019, ka la kynthup ia ka RR Colony lane kata ka Refugee Colony hapoh ka jingpyniaid jong ka Dorbar Shnong Rynjah bad ia kane la pynskhem ruh da ka KHADC.
U ong ba ka KHADC ka la pynduh ruh ia ka kyrteng Refugee Colony lane RR Colony bad la ai kyrteng tynrai ia kane ka jaka kum ka ‘Them Rynjah’.
“Hynrei kaba sngewsih ka long ba haduh kine ki sngi, bun bha ki Sign Board kiba don ha kane ka jaka ki kdew beit da ka kyrteng ‘RR Colony’, ka ba long ka jingialam bakla iaki ba bun balang bad kaba pyniap ruh ia ka jingbthah jong ka KHADC” la ong ka kyrwoh.
Namar kata, ka KHNAM ka la phah daka shithi sha ka Dorbar Shnong Rynjah ba kan sngewbha pyndam noh ia baroh kine ki jingthoh kyrteng RR Colony bad ban thoh bujli noh da ka Them Rynjah’ khnang ban lait na kano kano ka jingsngewthuh bakla.
