Shillong, K’lyngkot 23: Ka jingkulmar kala mih hapdeng ki Pulit bad ki nongkyrshan ka Congress ha Khanapara hynne ka sngi Ba-ar namar ka jingkyntait ka Sorkar Assam ban ai jingbit ia ka ‘Bharat Jodo Nyay Yatra’ u Rahul Gandhi ba kan rung sha Nongbah Guwahati.
Kane ka jingkulmar kala mih hadien ka jingpynbna jong u Myntri Rangbah ka Assam Himanta Biswa Sarma ba ong ba ka Yatra ba ialam da u Rahul Gandhi kam dei ban rung sha Guwahati, kaba pynlong ia ki Pulit ba kin khanglad shabar ka Nongbah.
Namar kane, ki nongkyrshan ka congress kila kyndang jubor ia ki jingjer jong ki Pulit bad pynpaw ia ka jingpyrshah kaba jur ia u Myntri Rangbah ka Jylla.
Da ki hajar ngut ki briew kila ialum ha Khanapara ban iasnohkti lang bad ka Bharat Jodo Nyay Yatra jong u Rahul Gandhi.
Kat kum ka khubor, katto katne ngut na ki nongkyrshan ka congress kila mynsaw ha kane ka jingiapynibor bad ki Pulit.
