Nongpoh, Kyllalyngkot 14: Ka Federation of Khasi Jaintia and Garo People (FKJGP), North Khasi Hills District ka la dawa na ka sorkar jylla ba kan maramot bad siangrong noh mardor ia ka surok naduh Sonidan sha Umsiang .
Haba kren sha ki Lad Pathai Khubor, u General secretary ka FKJGP, NKHD Bah Shanlang Diengdoh, , u la iathuh, ba ka seng ka dawa na ki bor ka sorkar jylla ba kan phaikhmat noh mardor ia ka jingeh u paidbah ha kaba ia dei bad ka jingsniew kaba la palat liam jong ka surok naduh Sonidan sha Umsiang kaba la buh jingeh ia ki paidbah nongleit nongwan khamtam ha ka kit ka bah bad ka pang ka shitom.
U la pynpaw ba ka seng ka sngewnguh ia ka sorkar jylla ba la lamkhmat da u Conrad K Sangma kum u Myntri Rangbah ka jylla halor ka jinglah ban pynurlong ia ka jingangnud u paidbah ban ioh ia ka surok ba paka kata naduh Umsning sha Mawhati, kaba don kumba 40 kilometer
U u la pynpaw, ba ka seng ka angnud ba ka sorkar jylla kan pynmang pisa shuh shuh sha ka thain Mawhati ban ioh pat ban siang rong sa ia ka surok ba dang sah sa kumba 40 kilometer kata naduh Sonidan sha Umsiang na ka bynta ka jingbit jingbiang ki paidbah kiba la iai mad ia ka jingeh kaba khraw ha ka leit ka wan tang namar ka jingsniew kaba palat liam jong u surok mynta da ki phew phew snem.
