Shillong, K’Lyngkot 12: U Myntri Rangbah ka Jylla Conrad K. Sangma, hynne ka sngi Thohdieng, ula leit jurip iaka PA Sangma Stadium ban peit ia ka jingpynkhreh pynkhrum n aka bynta ka jingwan iuh kjat ka President ka Ri India ha Tura.
Ka PA Sangma Stadium kan dei ka jaka ban plie iaka 5th Meghalaya Games haka 15 tarik mynta u bnai bad kane ka jingleit jurip ka dei ban pynthikna ba baroh ki jingdonkam kin biang lut nadong shadong kum shi bynta ban pyninam iaki kam ialehkai hapoh ka thain.
Ia u Myntri Rangbah la synrang lang da u Lamphang ka ingdorbar Thomas Sangma bad u Myntri ka tnat ialehkai Bah Shakliar Warjri haka jingdonlang ki ophisar ka tnat ialehkai, ki bor district bad MSOA.
Hadien ka jingwan jurip ka President barim ka Ri India ka Pratibha Singh Patil ha Tura ha u snem 2008, ka President Draupadi Murmu kan wan ha Tura kum ka kongsan.
Ka jingdonlang jong ka haka Meghalaya Games kan long ka burom iaka Jylla namar kan dei ka President naka jaidbynriew riewlum ba nyngkong eh jong ka India bad kan dei ruh ka President ka ba nyngkong ban sah miet ha Tura.
Haka 16 tarik mynta u bnai, ka President Draupadi Murmu kan wan sha Shillong naka bynta ban plie maw nongrim ia shibun ki Project bad kan leit ruh ban leit jngoh ia ka Mawphlang Sacred Grove.
