Shillong, K’lyngkot 11 : U Bah Kynjaimon Amse, u Nongiasaid Ain na East Jaintia Hills, ula mudui sha ka National Human Rights Council (NHRC) ba kan tuklar lem halor ka jingkynnoh bym lah ki shipai Border Security Force (BSF) ban iada ia ka jingim jong ki paid riewlum trai Jylla kiba shong ba sah ha ki thain Khappud ka India-Bangladesh.
Ia kane ka jingujor la mudui hadien ka jingshah pyniap ki arngut ki nongshongshnong khappud ha ki riew runar ka Bangladesh dang ha kine ki khyndiat sngi bala leit noh.
Uwei u rangbah ba kyrteng u Sylvanus Dhar ula shah pyniap dusmon ha palat 15-16 ngut ki nong Bangladesh katba u dang ap ia ka bri kwai ha Balisar, Lumsokie, Umkiang, East Jaintia Hills myn ha ka 6 tarik Kyllalyngkot.
Lai bnai mynshwa, kawei ka longkmie ba kyrteng ka Priskila Suchiang kala shah pyniap ha Shnong Dona Skur ha ka 12 tarik Nailar jong u snem bala lar.
Ha ka shithi ujor, u Bah Amse ula ong ba ha kine ki snem bala leit, ka jingwan tuh ki riew runar na Bangladesh kala jur bha hajan ki jingker sainar khappud, kaba la wanrah ia ka jingduhnong kaba khraw ia ki paidbah kiba rep kwai ha khappud ka India-Bangladesh.
Namar kane ka jingiai bteng ka jingwan tuh, ki riew paidbah kila hap ban sah ha ki khlaw ban iada iala ki jong ki marrepna ki nong Bangladesh kiba wan prong tuh ban leh ia ki kam bymman.
Haba kynnoh ba ki BSF kim shym lalah satai ban khang ia ka jingwan rung bein ki nong Bangladesh sha India, u Bah Amse ula ong “KI BSF kila pulom ha kaban pynthikna ia ka jingshngain ha ki jaka khappud ha shilynter ka thain Umkiang bad Lamasaki, East Jaintia Hills. (Namar kata), ki BSF, kiba dei khmih ban wanrah jingsngain ha khappud, ki dei ban ai jubab halor kane…”.
U Bah Amse ula ther tyngeh ruh ia ki BSF halor ka jingpyni ba ki dang mon ban khmih ia ka jingiaid ki kali hapoh ka National Highway-6 ha ka jaka ban khmih ia ki jaka ba marjan ki khappud.
U Bah Amse ula ong ba ka jingshah pyniap ki arngut ki briew ha khappud India-Bangladesh kala wanrah ia ka jingsyier ia ki paidbah ha khappud namar ki nong Bangladesh ki lah ban rung da kaba suk sha ka Ri ban leh ia ki kam tuh kam thiem bad ban pyniap briew.
Haba kyrpad ia ka jingtuklar jong ka NHRC, u Bah Amse ula ong “Nga sngewthuh ba kam long kaba suk ban pahara bad tehlakam ia ka jingrung tuh, nga shu kyrpad ban pynjur ia ka jingiaid pahara bad ban buh ia ki border post ha ki jaka ba ikongsan”.
