Shillong, K’lyngkot 09 : U Myntri ka Tnad ialehkai ka Jylla Bah Shakliar Warjri ula khaweh ia ka lama jong ka jingsdang ka torch relay ne ka jingrah ia ka dongmusa na kawei ka District sha kawei pat, ka 5th Meghalaya Games 2024 ka ban long naduh ka 15 tarik haduh 20 tarik K’lyngkot ha Tura, West Garo Hills District.
U Myntri ula aiti ia kane ka dongmusa ha madan SSA Stadium hapdeng ka jingiadon ryngkat ki nongkitkam ka MSOA, ki Ophisar ka Tnad ialehkai bad ki rang ki thei ialehkai na ki District bapher bapher.
Ia kane ka dongmusa la aiti ban rah da u rang iakop mareh ba pawnam ka Jylla Bah Binningstar Lyngkhoi, uba la ioh khur ia bun tylli ki takma na ki lympung iakhun ha Jylla, ha Ri bad shabar ri ruh kumjuh.
U Bah Benningstar un pynpoi ia kane ka dongmusa jong ka lympung ialehkai sha ka madan ialehkai ha Tura.
Kane ka lympung kan sdang da ka opening ceremony ha ka 15 tarik K’lyngkot bad yn plie ia ka da ka President ka Ri ka Droupadi Murmu.
Kiba bun ki kynhun ialehkai na ki District ka Jylla kila sdang ban iapoi ha ISBT ban pynrung kyrteng ialade.
Watla ka jingplie paidbah ia kane ka lympung ialehkai kan long ha ka 15 tarik K’lyngkot, ka jingialehkai phutbol la buh ba kan sdang naduh ka sngi Balang.
